Os Premios María Casares celebran hoxe a súa 28ª edición, nunha gala de entrega na que homenaxearán o xénero do teatro musical, e na que o mar será o tema que estará de fondo. Será a partir das 20.30 horas, no Teatro Rosalía de Castro da Coruña, e Sara Fandiño, a directora artística da cerimonia de entrega, conta cun elenco integrado por Alba Tojeiro, Germán Prenta, Iván L. Estévez, Iván Márquez, Mario Lagoas, Rocío Salgado e Verónica Peiteado.
Fandiño asina tanto a música como a letra dos temas que soarán durante a gala e conta coa colaboración de Alexandro González para a orquestración e mais os arranxos. O espazo escénico corre a cargo de José Expósito Ortiz.
Esta edición é a que rexistrou maior participación de toda a historia do certame. Presentáronse 47 espectáculos, e deles son 19 os que optan a levar algún dos 16 galardóns das diferentes categorías. Nesta edición, os María Casares, que están organizados pola Asociación de Actores e Actrices de Galicia, AAAG, contan co apoio da Xunta de Galicia, do Concello da Coruña, da Deputación da Coruña, do Padroado de Cultura do Concello de Narón, da Fundación Aisge e de Gadis, e coa colaboración do Centro Dramático Galego, o Centro Coreográfico, á Escola Galega de Teatro Musical, o Club Patinaxe Alquimia e o equipo do Teatro Rosalía de Castro. A gala será retransmitida en directo na canle dos Premios María Casares ás 20.30 h: https://www.youtube.com/c/premiosdeteatromariacasares .
19 espectáculos finalistas
O espectáculo Unha inimiga do pobo, de Talía Teatro, aspira a nove María Casares (espectáculo, dirección, actriz protagonista, actor secundario, adaptación-tradución, vestiario, maquillaxe, espazo escénico e iluminación), mentres que Hamelin, de Redrum Teatro, compite por seis (espectáculo, dirección, actor protagonista, actor secundario por partida dupla e iluminación).
Dúas obras do Centro Dramático Galego aspiran a cinco María Casares: Shakespeare en Roma (actor protagonista, actriz protagonista por partida dupla, vestiario e adaptación-tradución) e Un hotel de primeira sobre o río (actriz secundaria por partida dupla, dirección de movemento, vestiario e espazo escénico). O Auto do Castromil, de Producións Teatráis Excéntricas en coprodución co Centro Dramático Galego, tamén compite por cinco (espectáculo, dirección, actor protagonista, vestiario, espazo sonoro)
Entrega en man, de Contraproducións, opta a tres galardóns (adaptación-tradución, maquillaxe e actriz secundaria) mentres que por dous compiten as pezas Crisálida, de Caramuxo Teatro (espazo escénico e espectáculo infantil); Vox populi, de Malasombra (iluminación e espazo sonoro) e Deadpan Karaoke (maquillaxe e espazo sonoro).
Cun finalista atópanse outros dez espectáculos, tres deles optan ao mellor texto orixinal: Códice K, de Ainé; A nai, de Amorodio Teatro, e Mosca, de Ártika Cía. Outras tres aspiran ao galardón de monicreques, obxectos e figuras animadas: A teteira de Kabul, de Xarope Tulú; Coliño, de A Xanela do Maxín, e Nanai da China, de Pérez&Fernández.
Pola súa banda, Ándale! Bon apêttit!, de Teatro Ghazafelhos, e Backstage, de NegroLópez, son finalistas no apartado de espectáculo infantil, mentres que Frida, de A Cova das Letras, e Insubmisa, de Antagonista Teatro agardan levar o premio á mellor dirección de movemento. Durante a gala entregarase o Premio de Honra Marisa Soto a María Barcala e Vero Rilo lerá o Manifesto Galego do Día Mundial do Teatro.
