O 1 de febreiro asistín a un espectáculo de improvisación, Improconas, na nova librería artística A Merendeira Estudio Arte situada en Noia. Había tempo que non asistía ao teatro na periferia, fóra da metrópole, onde a vida leva outro ritmo afastado do balbordo que se percibe nas cidades. Unha forma diferente de ver e facer teatro que conecta co público dun xeito máis íntimo e informal.
Levado a cabo pola compañía Moito Morro Teatro, orixinaria de Cangas do Morrazo, as actrices Carlota Mosquera, Antía Costas e Carlota Rosón propoñen un xogo teatral no que implican o mesmo público, que se encarga de darlles as directrices axeitadas para realizar a proposta escénica. Un espectáculo no que nin as mesmas actrices saben que vai pasar, mais que asegura o entretemento, as ganas, e a conexión co público dende o minuto un.
O espazo non podería ser máis intimo e máis enxebre. Concibido como un espazo de creación artística polo seu fundador, o actor Jorge Gallardo, abriu as súas portas o pasado sábado 14 de decembro de 2024 e aspira a ser un lugar de encontro para novos artistas, así como un espazo onde realizar contacontos, obradoiros de fotografía, tardes de lectura ou escritura creativa. Así mesmo, A Merendeira Estudio vén de acoller o seu primeiro espectáculo de pequeno formato.
Como dicía máis arriba, sempre resulta pracenteiro ver e descubrir outras formas novas de ver teatro. Coido que nunca vira un espectáculo de improvisación mais fíxome conectar coas miñas clases de interpretación na ESAD de Galicia, dirixidas por Sergio Macías, onde aprendiamos a difícil tarefa de facer unha improvisación ben feita.
Con todo, volvendo ao noso espectáculo, gustaríame recomendar encarecidamente ver este Improconas, sen perder de vista pasarse polo local de A Merendeira, en Noia. Para ver a axenda tanto da compañía Moito Morro Teatro como de A Merendeira cómpre consultar as súas redes sociais: @amerendeira.studio e @moitomorroteatro.
