O actor Evaristo Calvo protagoniza Mala vida e pior morte de Ricardo III, un espectáculo unipersoal de Producións Teatrais Excéntricas, coproducido polo CDG e co apoio da Fundación Cidade da Cultura, entidades impulsoras do Ciclo Clásicas Desfeitas, no que se estrea esta fin de semana a peza, correspondendo ao volume número 12 do mesmo.
O edificio da Biblioteca e Arquivo de Galicia será o singular escenario do Gaiás no que se presentará a obra ao público hoxe, venres 21, e mañá, sábado 22 de febreiro, con catro pases (un ás 18.00 e outro ás 20.00 horas cada día). O traballo xa tivo moi boa acollida previa, pois as entradas, limitadas pola singularidade do espazo, están xa esgotadas para os catro pases. A peza ten xa novas datas de exhibición noutras localizacións galegas:
- O 14, 15 e 16 de marzo, ás 20.00 horas, estará na Sala Ártika, en Vigo.
- O 22 de marzo formará parte da XXV Mostra de Teatro Clásico de Lugo, cunha función ás 20.30 horas no Auditorio Gustavo Freire.
- O 12 de abril, ás 19.30, representarase no Teatro da Beneficencia do Concello de Ortigueira.
- O 26 de setembro terá tamén unha función no Concello da Guarda.
Sinopse
“Quen foi Ricardo III de Inglaterra? Un conspirador? Un asasino sen escrúpulos? O personaxe deformado e tiránico que nos deixou William Shakespeare na súa célebre traxedia é quizais o retrato máis coñecido polo público xeral de Ricardo de Plantagenet, derradeiro rei da casa de York. Fronte a el, o volume 12 do ciclo Clásicas desfeitas propón unha nova interpretación audaz e humorística do personaxe histórico e literario, que leva por título Mala vida e pior morte do rei Ricardo III”.
Humor fronte á lenda negra
O actor e dramaturgo Evaristo Calvo é o encargado de cargar coa coroa nesta obra contemporánea “que explora a manipulación histórica e cultural que consolidou a lenda negra do monarca inglés”. Un monólogo “que combina humor grotesco, lirismo e un marcado tenebrismo no seu espazo escénico para transcender a pura revisión histórica, presentándose accesible para calquera persoa, coñecedora ou non do clásico de Shakespeare”, segundo presenta o programa da peza.
“O que Ricardo vai reivindicar nesta peza non é xa o recoñecemento que merece como rei tanto como a restitución dunha condición humana que semella negárselle ao convertelo nun monstro, nun personaxe sen outra función que a de demostrar canta maldade cabe nun só individuo. Coa complicidade do intérprete e da audiencia, o monarca transitará o tempo como mellor lle conveña, movéndose fóra do seu período histórico vital porque si, porque lle peta e, sobre todo, porque así é mais divertido”, engádese.
Na construción de Mala vida e pior morte do rei Ricardo III intervén un colectivo artístico amplo e multidisciplinar que está a traballar no marco das Residencias Artísticas do Gaiás (REGA). Ao cargo da dirección escénica están o seu intérprete, Evaristo Calvo, o director e actor Antón Coucheiro, e a directora e creadora Alessandra García (Premio Max das artes escénicas e Premio El Ojo Crítico de Teatro de RNE en 2022). A poeta e escritora María Lado participa na dramaturxia da obra, tamén canda Evaristo Calvo, e a produción conta co asesoramento da recoñecida directora Ana Vallés na parte teatral, e da profesora e investigadora da USC, Cristina Mourón Figueroa no apartado histórico.
O ciclo
Clásicas desfeitas é un ciclo impulsado polo Centro Dramático Galego coa Cidade da Cultura de Galicia para redescubrir os clásicos a través das linguaxes da escena contemporánea, e encádrase no programa de Residencias Artísticas do Gaiás (REGA). Na fin de semana seguinte a Cidade da Cultura acollerá o volume 13 do ciclo, coa estrea de Medea–Mamá–Monstro, de Helena Varela e Laura Porto, en dúas funcións: unha o venres 28 de febreiro e outra o sábado 1 de marzo, ás 19.00 horas.
