Despois dun ano cheo de recoñecementos á súa montaxe Unha inimiga do pobo, Talía Teatro estreou esta fin de semana Un deus salvaxe, da dramaturga francesa Yasmina Reza. Trátase dun texto levado a escena en numerosas ocasións e á gran pantalla da man de Roman Polanski.
Baixo a dirección de Artur Trillo, o elenco, composto por María Ordóñez, Dani Trillo, Marta Lado e Toño Casais, dá vida a uns personaxes cheos de matices, capaces de provocar tanto situacións con certo humor como a reflexión. A obra “disecciona as dinámicas familiares, a competitividade e as tensións latentes na sociedade contemporánea, ofrecendo unha visión irónica e profundamente humana”.
O espectáculo estreouse na Casa da Cultura de Cee esta fin de semana cunha primeira función o venres, 28 de febreiro, e un segundo pase onte, sábado 1 de marzo, ás 20:30 horas. A montaxe conta coa axuda á creación escénica da Axencia Galega das Industrias Culturais (Agadic) na modalidade plurianual do ano 2023.
Próximas datas
Na súa primeira fase de distribución a posta en escena de Talía Teatro da peza Un deus salvaxe inicia unha xira que percorrerá localidades como Bertamiráns (Ames) (7 de marzo), Carballo (14 de marzo), Vimianzo (15 de marzo), A Coruña (21 e 22 de marzo), Santiago de Compostela (27 e 28 de marzo), Oleiros (29 de marzo) e Ourense (5 de abril).
Ficha artística e técnica
Reparto: María Ordóñez, Dani Trillo, Marta Lado,Toño Casais
Escenografía e iluminación: Dani Trillo
Vestiario e maquillaxe: Martina Cambeiro
Música orixinal: Manu Abraldes
Fotografía: Rubén Prieto
Produción: Auri Ferreiro e Artur Trillo
Axudante de dirección: Diego Rey
Dirección: Artur Trillo
