Os XXIX Premios de Teatro María Casares entregaranse hoxe, xoves, 3 de abril, no Teatro Rosalía Castro da Coruña, a partir das 20.30 horas. A gala, que renderá tributo aos diferentes oficios que conforman o mundo do teatro, será retransmitida a través da canle de Youtube dos Premios mediante esta ligazón, e estará conducida por Sarabela Teatro. Fernando Dacosta é o responsable da dirección e da dramaturxia e o elenco está conformado por seis intérpretes: Elena Seijo, Sabela Gago, Belén Constenla, Josito Porto, Fernando González e Víctor Mosqueira. Vadim Yuknevich encárgase da música, mentres que o vestiario corre a cargo de Tegra e Lele. José Bayón e Rubén Dobaño encargaranse das tarefas de iluminación e mais de son, Héctor Martínez exercerá como auxiliar de dirección, e Marta Horjales asume a produción executiva dos Premios.
Homenaxe a Xabier Deive
Neste 2025, a AAAG decidiu concederlle o Premio de Honra Marisa Soto a Xabier Deive, para lembrar e homenaxear a figura do actor, falecido o pasado mes de xullo. É a terceira vez que se entrega esta distinción a título póstumo, despois da concesión a Xosé Manuel Olveira, Pico, e a Lino Braxe. Deive, moi coñecido para o público galego, antes de iniciar a súa traxectoria como actor exerceu como técnico e coñeceu as diferentes áreas do sector teatral. Ademais foi o presidente da AAAG entre 2019 e 2021, nuns anos especialmente complexos para a profesión a causa da pandemia.
Lectura do Manifesto Galego polo Día Mundial do Teatro
Durante a gala tamén se lerá o Manifesto Galego no Día Mundial do Teatro, que este ano asinou a xornalista Belén Regueira, decana do Colexio Profesional de Xornalistas de Galicia (CPXG).
Os Premios María Casares están organizados, dende a súa creación en 1997, pola Asociación de Actores e Actrices de Galicia (AAAG) e contan co apoio de institucións e entidades como a Xunta de Galicia a través da Axencia Galega das Industrias Culturais (Agadic), a Deputación da Coruña, o Concello da Coruña, a Fundación AISGE ou Gadis.
17 espectáculos finalistas
Neste 2025, un total de 17 espectáculos aspiran a conquistar os Premios María Casares. Sarabela Teatro, precisamente, optará a 14 galardóns (entre eles, os de dirección, espectáculo ou as catro categorías de interpretación) pola obra O Dragón de Ouro. ButacaZero e a súa obra Iribarne aspiran a 12 premios (entre eles, espectáculo, dirección, texto orixinal, actor protagonista, actriz protagonista ou actriz secundaria). Estas dúas obras competirán polo premio ao mellor espectáculo xunto a Go Home, de Etiqueta Negra.
Os actos e as profecías, obra coa que o Centro Dramático celebrou o seu 40º aniversario, optará a gañar catro categorías, como tamén o fará en idéntico número de apartados As gardiás ou o nó do tecelán, montaxe coa que regresou Teatro de Ningures á produción escénica. Cinco pezas aspiran a gañar dous premios: Monstros, de Producións Teatráis Excéntricas; O mundo está roto pero pódese camiñar, de Contraproducións; Eu, fraude!, de Paula Pier; Non pasarán e PUM! PUM! Quen hai?, as dúas de Ártika Cía.
Nada se sabe, coprodución de Culturactiva co Centro Dramático Galego, aspira a un galardón, como tamén Apaga o Candil, de Contraproducións; Sobre o extravío ou a arte de perderse, de Furia Sotelo e Rogelio III (La fête), de Assircópatas, que disputará o premio ao mellor espectáculo infantil coas xa mencionadas pezas Monstros, O mundo está roto pero pódese camiñar e Pum! Pum! Quen hai?
Por último, tres obras son finalistas no apartado de espectáculo de monicreques, obxectos e figuras animadas: Os contos do Lobicán, de Redrum Teatro; Moby Dick, de Pedras de Cartón, e Gaia Baba, a meiga, de Nauta Teatro.
