O venres 4 de abril tiven a oportunidade de ver no Auditorio Municipal de Vigo o último espectáculo de Producións Teatrais Excéntricas As desterradas, no marco de programación de Vigocultura.
Esta é a posta en escena do texto co mesmo nome As desterradas, de Carme Varela. Esta peza foi galardoada no 2020 co premio Álvaro Cunqueiro de textos teatrais, e foi un auténtico éxito en vendas. A obra non chega aos escenarios ata este ano 2025, dirixida por Quico Cadaval e estreada no Teatro Principal de Santiago de Compostela en marzo deste ano.
As desterradas cóntanos a historia das derradeiras monxas do Mosteiro de San Salvador de Albeos, que foron desterradas pola raíña de Castela a Santiago de Compostela. O espectáculo retrata a desidia destes últimos días, máis tamén aparece a forza e resiliencia destas monxas, que, a pesar de todo, loitaron por quedar no seu fogar. Grazas a isto, As desterradas resulta ser unha lección de historia para todos os seus espectadores.
O espectáculo, ás veces, roza o documental, xa que fai testemuña ao espectador da cotiandade destas mulleres. A vida segue a pesar das súas desgrazas, e as súas rutinas seguen presentes a pesar do extraordinarias que poidan chegar a ser as súas circunstancias, e isto é algo que podemos ver na peza moi claramente. A pesar disto, a peza consegue trenzar moi ben estes elementos con outros máis cómicos, que non poden faltar nun espectáculo de Quico Cadaval.
Podemos destacar o traballo interpretativo. As actrices son quen de combinar estes momentos máis humorísticos, co tráxico, e co cotián. Ademais, entre elas podemos percibir química e confianza, que dotan o espectáculo dunha tenrura moi característica. Á parte, a iluminación e o espazo sonoro conseguen acompañar esta historia dun xeito orgánico e coidado, de maneira que a viaxe que proporciona As desterradas ao espectador resulta moito máis rica e emocionante.
- Domingo no teatro da man do Gorrilla - 21/11/2025
- Costa da morte, cartografía dun naufraxio - 05/08/2025
- As desterradas - 29/07/2025
