A nova edición de Escenas do cambio, o festival de artes escénicas de vangarda impulsado pola Consellería de Cultura, Lingua e Xuventude da Xunta de Galicia, desenvolverase entre o 7 e o 10 de maio na Cidade da Cultura (no Gaiás) e no Salón Teatro. Nel participarán artistas e compañías de Alemaña, Bélxica, Brasil, Colombia, Cuba, Guinea Ecuatorial, México, Portugal, Lituania e España.

Durante a presentación, a semana pasada, desta iniciativa que suma xa 12 edicións, o director xeral de Cultura, Anxo M. Lorenzo, puxo en valor a oportunidade que supón esta iniciativa para “fomentar o diálogo creativo entre diferentes rexións e países”. Neste senso, adiantou que, baixo a dirección artística da bailarina e coreógrafa Kirenia Martínez Acosta, Escenas do cambio “contará este ano coa participación de oito coproducións internacionais e tres nacionais sumando un total de 11 espectáculos con tres estreas absolutas e outras sete pezas que poderán verse por primeira vez en Galicia, das cales tres son tamén estreas a nivel español”.

En concreto, para a edición de 2026, chegarán dende o outro lado do Atlántico La Cura e El Vacío (ambas estreas en España), nas que o coreógrafo cubano Julio César Iglesias dirixe a Compañía Colombiana de Danza Contemporánea. Tamén a conferencia escénica Arder Épica (Cap. 1), na que o artista brasileiro Reinaldo Ribeiro constrúe “unha nova memoria colectiva a partir das cinzas que deixou o incendio do Museo Nacional do Brasil en 2018”. Forma parte tamén da programación a instalación inmersiva Hecatombe II: Movementos e rituais para a renovación do mundo, da colombiana de orixe indíxena Martha Hincapié Charry, “na que se rescatan os saberes ancestrais de tres líderes nativos das primeiras nacións americanas”.

O festival de teatro, danza e arte en acción do Gaiás será tamén o lugar onde se poderá ver por primeira vez en España Fear:less, un pas de deux ideado pola alemá Silke Z. que abandona o simbolismo romántico clásico destes duetos para construír unha obra na que a conexión física dos bailaríns cuestiona o medo actual ao contacto físico.

Conexións creativas desde Galicia

Na mesma liña de colaboración entre artistas e compañías con procedencias diversas traballan as dúas estreas con ADN galego que terá o festival: 52-Blau e Black Box. Unha saga épica. A primeira é unha obra que muda co espazo, dirixida por Elena Castellanos e Xián Martínez. Producida por iXa, compañía de danza con identidade mixta procedente de Galicia, País Vasco e Navarra, a peza conta coa apoio do Centro Coreográfico Galego.

En Black Box, Hugo Torres (ex integrante de Voadora) convida o público a “unha cea escénica na que irá debullando a súa liñaxe familiar para reclamar a pegada na historia das personaxes anónimas que non chegan a figurar nos libros”. Trátase dunha peza internacional que conta coa produción do Centro Dramático Galego, a compañía portuguesa Trigo Limpo e o FITEI – Festival Internacional de Teatro de Expressão Ibérica do Porto. O público terá ocasión de achegarse ao proceso creativo desta proposta o próximo 27 de marzo, nun encontro aberto dentro das residencias escénicas DescArtes que promoven o Centro Dramático Galego e a Cidade da Cultura.

A última estrea absoluta de Escenas do cambio será Este himno llevará la palabra Euforia, coa que a compañía vasca La Intrusa (Premio Nacional de Danza en 2015) quixo celebrar no marco do festival os seus 30 anos en activo.

Resistencia, revelación, reinvención

Revelesencia é o termo —entre revelación, efervescencia e esencia— co que Kirenia Martínez Acosta definiu un programa “que interrelaciona tres camiños a través das artes escénicas: o camiño do que persiste, o do que se revela e o camiño que se reinventa baixo novas formas”. Neste paraugas temático “teñen cabida os saberes antigos, as memorias dos territorios, os afectos, as ecoloxías sensibles e os corpos fóra da norma”, segundo explicou na presentación do mesmo

Precisamente para dar visibilidade a estes últimos incluíu Entrecruzad@s, peza de Juliana Reyes que constrúe “unha partitura viva sobre a identidade, a exclusión e a posibilidade de comunidade, involucrando a artistas de España, Colombia, México e Guinea Ecuatorial”. Das “soidades do mundo actual, entre as que se contan persoas migrantes, maiores, profesionais solitarios ou buscadores de afecto virtual, así como das posibilidades de conexión e amizade” ocúpase La Calidesa, a innovadora proposta entre o teatro de obxectos e a instalación interactiva da compañía balear Société Mouffette.

Para completar a programación, en Horizontes Errantes, Laura Aris e Jakob Jautz transforman en danza e teatro físico a súa peregrinación artística pola Selva Negra alemá e o Camiño de Santiago desde Asturias a Galicia, coa música do portugués Jorge da Rocha, nunha peza realizada grazas ao apoio do programa de Residencias Artísticas do Gaiás.

O festival conta coa colaboración do Instituto Nacional de las Artes Escénicas y de la Música, o Goethe Institute, o Camões–Centro Cultural Português em Vigo, a Axencia Galega das Industrias Culturais, o Centro Dramático Galego e o Centro Coreográfico Galego.

Toda a información desta nova edición de Escenas do cambio está dispoñible na web da Cidade da Cultura e na web do festival, e as entradas están xa dispoñibles para a súa compra en liña.