Hedwig Dances, o conxunto de danza-teatro con sede en Chicago, continúa en 2021 coa temporada de estreas virtuais. A peza HOME (CASA), dirixida por Ana Beatriz Pérez, coreógrafa cubana asentada en Galicia, presentarase virtualmente na web da compañía estadounidense.
Hedwig Dances, compañía asentada en Chicago, estreará virtualmente o próximo 7 de marzo a peza HOME, coreografada pola artista de danza Ana Beatriz Pérez desde a súa base creativa en Galicia. HOME é unha exploración contemplativa da experiencia humana do fogar: refuxio, santuario, niño, asilo. Ana Beatriz Pérez, desde A Coruña, está a traballar con bailaríns da Hedwig en Chicago. HOME é unha continuación das prácticas coreográficas multiplataforma que Hedwig xa ten experimentado en espectáculos realizados anteriormente. Nesta peza tamén participa a compositora galega María Move e o músico Raúl Grillo, cunha partitura orixinal que realza o baile.
Hedwig Dances, ademais, realiza unha serie de salóns virtuais, denominados Art of Making Art, que reúnen aos bailaríns e aos seus colaboradores en discusións reflexivas e entre bastidores sobre o seu proceso creativo. O pasado domingo 7 de febreiro, realizouse o salón virtual Art of Making Art sobre HOME, antes da súa estrea oficial en marzo.
Podes ver o salón virtual de HOME premendo nesta ligazón
Home
HOME usa a casa como metáfora e reflexiona sobre o refuxio, a intimidade e a comodidade que ofrece. Nun mundo alienante, cambiante e imprevisible, catro persoas con vidas diferentes pasan a súa vida diaria esperando. Mentres todo cambia fóra, algo comeza a cambiar dentro deles. Como a nosa experiencia de fogar que nos acompaña desde o nacemento, enchémola de significado e, á súa vez, proporciónanos un sentido. A casa somos nós. A coreógrafa, con sede en Galiza, Ana Beatriz Pérez, traballando cos bailaríns de Hedwig en Chicago, baséase nas prácticas coreográficas multiplataforma de Hedwig. A partitura musical orixinal da compositora galega María Move realza o baile.
Hedwig Dances
Hedwig Dances é un conxunto de teatro de danza contemporánea que cumpre 35 anos baixo a dirección artística do seu fundador, Jan Bartoszek. A compañía leva o seu nome en homenaxe á avoa de Bartoszek. En residencia no Ruth Page Center for the Arts, as audaces e interdisciplinarias colaboracións de Hedwig Dances combinan coreografía poética, imaxes proxectadas e músicas orixinais. O recoñecido conxunto de danza realizou 1500 actuacións en prestixiosos escenarios nacionais e internacionais. A compañía actuou dúas veces en funcións exclusivas en Joyce SoHo (Nova York) e polo mundo adiante, na Bauhaus Dessau (Dessau, Alemaña), Teatro Nacional De Cuba, Sala Avellaneda (A Habana, Cuba), Teatro Diana (Guadalaxara, México), Grace Street Theatre (Richmond, Virxinia) ou o Margaret H’Doubler Performance Space (Madison, Wisconsin).
