Coa fin de recuperar e reactivar a actividade escénica en canto as autoridades sanitarias o permitan, o INAEM ampliará até marzo de 2021 o Programa PLATEA, para o que destinará 5.250.000 de euros.
O Ministerio de Cultura e Deporte, a través do Instituto Nacional de las Artes Escénicas y de la Música (INAEM) e en colaboración coa Federación Española de Municipios e Provincias (FEMP), decidiu ampliar o programa PLATEA 2020, destinado a fomentar a circulación estatal de espectáculos, coa incorporación dunha serie de medidas extraordinarias de flexibilización que buscan recuperar, reactivar e incrementar a contratación e a actividade escénica nos teatros públicos de entidades locais, en canto as autoridades sanitarias o permitan, así como garantir a sustentabilidade das compañías de teatro, música, danza e circo.
A adaptación do programa PLATEA 2020 á situación de excepcionalidade
A reformulación do programa PLATEA para esta edición persegue paliar os efectos da paralización do programa como consecuencia da declaración do estado de alarma e o peche dos recintos escénicos. A posta en marcha de PLATEA 2020 pderase facer efectiva unha vez que as autoridades sanitarias permitan a reapertura dos espazos escénicos. Deste xeito, os 5.250.000 euros previstos polo INAEM para financiar en 2020 os contratos de xira de compañías de teatro, danza, espectáculos para a infancia e a mocidade e de rúa e algunhas compañías privadas de lírica, dedicaranse na súa totalidade a reprogramar as cancelacións e substituír con outros títulos os que no sexan susceptibles de reprogramación, especialmente na época do Nadal e durante o primeiro trimestre de 2021, datas nas que, até o de agora, non estaba vixente este programa.
A prórroga de PLATEA 2020 e a ampliación do calendario de actuacións é, xa que logo, a primeira das medidas extraordinarias adoptadas para adaptarse ás circunstancias actuais. O programa, que estaba previsto inicialmente até o 29 de novembro de 2020 –22 de novembro no caso das funcións que se celebrasen nas Illas Canarias, Baleares, Ceuta e Melilla–, prolongarase até o 14 de marzo de 2021.
Tamén de forma extraordinaria, permitirase programar representacións pertencentes ao catálogo de Platea 2020 nos festivais sectoriais organizados polas entidades locais acollidas ao programa.
Por último, e coa fin de que ningunha das entidades locais presentes nesta edición poida verse penalizada na súa renovación para formar parte do programa de 2021, a edición PLATEA 2020 non se considerará aos efectos de avaliación xeral do programa nos recintos participantes.
Ademais destas medidas, estase traballando noutras iniciativas que buscan garantir a sustentabilidade das compañías de teatro, danza, música e circo e a estabilidade de estruturas culturais. Entre elas, o reforzo das axudas anuais do INAEM cunha convocatoria extraordinaria e a activación do Centro Nacional de Difusión de la Danza.
