Imaxe de Ignacio Urrutia

PUBLICIDADE

O auditorio municipal Cine Alovi das Pontes acollerá este venres 3 de decembro a estrea de Credo, o último espectáculo de Nova Galega de Danza, a agrupación dirixida polo coreógrafo e bailarín ferrolán Jaime Pablo Díaz. Haberá dúas funcións: unha ás 19.00 horas e outra ás 21.00 horas.

O espectáculo, que conta co apoio da Xunta de Galicia a través do programa de coproducións da Agadic no Centro Coreográfico Galego, presenta unha adaptación poética da obra de Celso Emilio Ferreiro. Credo fai referencia á viaxe interior que supón o Camiño de Santiago mediante unha peza escénica que combina música e danza, unindo na mesma liña conceptual os cruceiros de pedra que se atopan na paisaxe galega do percorrido xacobeo.

O corpo de danza de Credo, composto por seis bailaríns da compañía (Inés Vieites, Estefanía Gómez, Uxía Rivas, Pablo Sánchez, Ricardo Fernández e Amara Pérez), desenvolve un traballo físico de alta intensidade pensado para indagar os límites da linguaxe corporal e o seu vínculo co espazo habitado. A música orixinal, a cargo de Sergio Moure, interpreta os sons “dunha Galicia intemporal imbricada na multiculturalidade propia do Camiño”. A coreografía corre a cargo de Fabián Thomé, con coreografía tradicional a cargo de Jaime Pablo Díaz.

Nova Galega de Danza ven de ser recoñecida recentemente co Premio Max ao Mellor intérprete masculino de danza pola actuación de Iván Millar en Leira, unha peza pola que a agrupación tamén foi nomeada ao Mellor Espectáculo de Danza. Este fito sitúa á compañía como a primeira de Galicia desta disciplina en ser galardoada por este certame. A agrupación, creada en 2003, naceu coa vocación de innovar ao tempo que fusiona en vivo a danza e música de raíces galegas. Credo supón o sétimo espectáculo de Nova Galega de Danza tras Leira (2021), Son (2016), Dez (2013), Tradición (2008), Engado (2006) e Alento (2003).

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!