O Clube Clavicémbalo de Lugo acolle mañá, o venres e o sábado os Microefectos Dramatúrxicos, en pases de 20:30 e 22:30. Regresan logo de tres meses dende a sesión de setembro, a primeira dende a parada por mor da pandemia.
Nesta sesión representaranse catro pezas novas do grupo, que cumpriu oito anos en maio, duns quince minutos de duración: Fartura, escrita e dirixida por Conchi Madrina, que tamén actúa, xunto con Brais García e Anxo Manoel; Inventario, escrita e dirixida por María Grandío, e interpretada por ela, xunto con Raquel López, Anxo Manoel, Brian Rodríguez e Elvira Velasco; Alors on Dance, escrita e dirixida por Anxo Manoel, na que actúan María Grandío, Conchi Madrina e Brais García; e Farsa da señoritinga e o caballerete – Un conto de Nadal, escrita e dirixida por Elvira Velasco e interpretada por ela e Anxo Manoel.
