As persoas seleccionadas na segunda convocatoria de artistas emerxentes en danza Da man, convocada por AMARELO e Manu Lago, co patrocinio da Agadic, a través do Centro Coreográfico Galego, serán acompañadas durante un novo proceso de creación durante o ano 2025.
Na pasada convocatoria Da Man realizou o acompañamento ao proxecto Mesura, da galega Raquel Ferradás, que se puido ver en 9 festivais de Galicia e Aragón, e ao proxecto Todo esto para nada, do colectivo madrileño A ras de suelo, que se estreará en 2025.
Da Man é un proxecto colaborativo de AMARELO e Manu Lago co patrocinio da Axencia Galega das Industrias Culturais a través do Centro Coreográfico Galego para o acompañamento de artistas emerxentes en danza seleccionadas mediante convocatoria, cos obxectivos de impulsar novas artistas en danza, promover a creación e dinamizar o mercado con novas linguaxes.
As artistas son acompañadas durante o proceso de creación dunha peza ou do proxecto de compañía a través de titorías de contido administrativo, loxístico, artístico, financeiro e de calquera outra temática que o proceso en concreto requira. Durante este acompañamento trasládanselles os coñecementos e informacións necesarias para realizar unha produción profesional, busca de residencias e recursos económicos, venda e distribución do espectáculo, redes e circuítos, contactos, etc.
Bases da convocatoria
Que busca?
Un proxecto de danza de artista/s emerxente/s galega/s ou residentes en Galicia. “Artistas que, sen importar a súa idade, xénero, nin datos biométricos, non teñan creados máis de 3 espectáculos integrados en circuítos/programacións profesionais e queiran iniciar o proceso de creación dunha nova peza de danza, impulsar a súa compañía ou outro tipo de proxecto arredor da danza”.
Que ofrece?
1- Un acompañamento 360º: Acompañamento en todo o proceso de xestión de compañía, de produción e creación, plan de distribución e calquera outra etapa que contemplen os plans das creadoras.
2- A inclusión da peza no catálogo de AMARELO, no caso dunha nova produción.
Que pide?
3 documentos en pdf:
1- Carta de motivación. Máximo 1 páxina.
2- Proxecto no que se mostren as claves da nova creación ou do proxecto (tipoloxía, formato, equipo, calendario previsto, e todos os datos que se consideren relevantes). Máximo 3 páxinas
3- CV con ligazóns a traballos anteriores (se os hai). Máximo 2 páxinas.
Presentación
Prazo de recepción de solicitudes: Ata o 11 de novembro de 2024. Hai que enviar a documentación ao enderezo de correo electrónico [email protected] co asunto “Da Man”.
O día 25 de novembro de 2024 publicarase a resolución en redes e web.
