Hoxe, venres 21 de febreiro, estréase Transeúnte de Daniel Rodríguez, en coprodución co Centro Coreográfico Galego (Agadic/Xunta de Galicia), no Teatro Municipal de Tui ás 21 horas.
“O termo transeúnte refírese a estar de paso, non residir, excepto temporalmente nun lugar. Por iso incidimos na dualidade entre o permanente e o transitorio nos corpos da nosa xeración, atravesado polo folclore e a tradición, integrando influencias do noso contexto actual”, en palabras de Daniel Rodríguez para Redeescena.
O equipo artístico de Transeúnte está composto por catro bailarinas e bailaríns en escena: Javier de la Asunción, Laura García, Andrea Pérez e o propio Daniel Rodríguez; a música e o canto en directo de Aida Tarrío, de Tanxugueiras, e Artur Puga, de Mondra, que tamén bailan; o acompañamento artístico de Arnau Pérez; a iluminación de Mauricio Pérez Fayos; o vestiario de Sheila Pérez; e a produción musical de Carreño e Acacia.
Transeúnte reflexiona e potencia a relación das novas xeracións coa tradición e o folclore neste mundo tecnolóxico e globalizado no que aínda habita a sabedoría innata dos nosos instintos.
Transeúnte celebra a diversidade cultural, resalta a nosa conexión como seres humanos e convida a unha viaxe que honra o pasado, vive o presente e busca e abraza o futuro.
Mover(se) desde a raíz
No traballo da compañía, Daniel Rodríguez propón a procura da comuñón entre o baile tradicional e a danza contemporánea. Os obxectivos principais desta investigación son achegar a danza tradicional ao panorama contemporáneo e ao seu público, promover o contacto da danza tradicional coas tendencias artísticas actuais ofrecendo unha visión contemporánea das posibilidades que brinda o baile tradicional, así como fomentar a práctica e conservación destes bailes de raíz.
Daniel Rodríguez comezou os seus estudos de danza en Tui con Paula Cobián. Tras graduarse no Conservatorio Superior de Danza María de Ávila de Madrid, formou parte de diversas compañías e proxectos, destacando na Compañía Daniel Abreu, na produción de Daley (Da) e no Banquet Collective. En 2022 creou o seu primeiro traballo A raíz de, polo que recibiu o premio SóLODOS en Danza de Ourense e outros galardóns.
Ademais do seu traballo como bailarín, Rodríguez dirixiu e realizou coreografías para artistas como Mondra, Fillas de Casandra ou Tanxugueiras, contribuíndo tamén como director de movemento ao videoclip Marimondra de Mondra, que está nomeado aos Premios Mestre Mateo.
