Isabel Risco volve enfundarse neste 2025 na pel da súa personaxe Nabiza Girl no espectáculo As aventuras de Nabiza Girl. O estraño caso da cultura minguante, que estrea hoxe, domingo 23 de febreiro, ás 19.00 horas na Casa da Cultura Pintor Lloréns de Sada. Este Concello acolleu a residencia artística durante a que se desenvolveron os ensaios da montaxe, unha produción conxunta entre Isabel Risco e a produtora La Yogurtera. A distribución corre a cargo de Culturactiva. A xirará continuará o 14 de marzo no Centro Ágora da Coruña, en Barbadás o 28 de Marzo e en Muros o 5 de abril.
Con esta nova montaxe escénica, a actriz, clown e autora Isabel Risco recupera para a escena a súa personaxe Nabiza Girl. Esta foi medrando ao longo dos anos e espallando a súa pegada por diferentes disciplinas artísticas. No ano 2023, Risco en colaboración co guionista Carlos Ares e co debuxante Manel Cráneo, xunto á produtora Marta Horjales á fronte da coordinación, lanzou a banda deseñada As aventuras de Nabiza Girl. Operación Breogán (Demo Editorial, 2023). Xa no 2024, o mesmo equipo empurrou a Nabiza Girl para que saltase ao audiovisual con Así falamos, así sentimos, unha serie web en stop-motion creada pola produtora coruñesa Algarabía Animación para a súa difusión en redes sociais co obxectivo de reforzar a identidade galega entre a mocidade cun ton natural e desenfadado.
A peza
Agora, en 2025, Nabiza Girl regresa ao seu espazo orixinal, os escenarios, para enfrontarse desta vez a un novo e grave reto: o esmorecer da cultura galega. A loita para reverter esta situación, que inclúe entre outros perigos a mingua de falantes que reflicten as estatísticas, será o leitmotiv deste novo espectáculo escénico que Risco escribiu xunto a Carlos Ares e a Fran Rei, quen se encarga tamén da dirección da obra. Nesta aventura, a superheroína non estará soa, xa que conta coa compaña de Don Galizo, un leal escudeiro interpretado por Alberte Bello que porá todo tipo de atrancos cómicos.
O equipo da montaxe complétase coa coreógrafa Estefanía Gómez, quen se encarga do movemento escénico; Suso Montero, quen, xunto á propia Risco deseñou a escenografía; Javier A. Ayude, responsable da iluminación, e Marta Horjales como coordinadora.
