Esta mañá deuse a coñecer a través de diferentes medios e redes sociais o falecemento do músico e compositor Piti Sanz. Nado en Huelva no ano 1966 pero arraigado en Galicia dende hai moitos anos e residente en Lugo, estivo moi vinculado coa escena e o audiovisual galegos, compoñendo numerosos espazos e bandas sonoras.

Como músico foi fundador de Los Contentos e formou, con Luís Tosar, a banda musical Di Elas, e o seu último proxecto musical foi o disco S4N7, aínda que tiña tamén novos proxectos vinculados coas artes escénicas en marcha. Hoxe moitas entidades e compañías de artes escénicas coas que colaborou aproveitaron para compartir mensaxes lamentando a perda humana e creativa e lembrando o seu traballo no campo cultural galego, no que deixa unha fonda pegada.

A AAAG destacou como “Sanz lle abriu un camiño fundamental no noso teatro á presenza de músicos en escena, ofrecendo música ao vivo e unha forma diferente de interpretación anovadora” É que, como tamén lembrou, ao longo da súa traxectoria, Piti Sanz traballou con compañías fundamentais do teatro galego, como Ollomoltranvía, Mofa e Befa ou Producións Teatráis Excéntricas. Dende estas últimas tamén quixeron despedirse de Sanz e lembrar o seu papel de Max, “personaxe coa que brillaba en Monstros”, así como que a súa última ilusión “era o proxecto no que estaba embarcado con Mofa e Befa, Os dous de sempre. O regreso, no que interpretaría o cego musical”, que agora esperan “atopar á volta do camiño”.

Piti Sanz estivo de finalista nos Premios de Teatro María Casares nove veces, obtendo dous galardóns na categoría de música orixinal, por Finis Mundi Circus, de Mofa e Befa, en 1999, e por Ñiquiñaque, de Ollomoltranvía, en 2002. A Academia Galega do Audiovisual quixo tamén resaltar o “talento e compromiso co ámbito cultural” do músico e compositor, que obtivo ao longo da súa traxectoria cinco premios Mestre Mateo.