Neste libro, Peter Slade relata as súas moitas experiencias con nenas, nenos e adolescentes procurando responder ás dúbidas que sente todo educador cando se propón facer un traballo de teatro na educación.
O autor expón regras claras de actuación, mostra como ampliar o xogo, como arrequecelo e como introducir outras linguaxes. Dá ideas, abre perspectivas, amplía as posibilidades e distingue claramente as propostas en función de cada etapa educativa facendo un paralelismo entre o Xogo Dramático e a Arte Infantil desde preescolar até a adolescencia.
A raíz do xogo dramático é a brincadeira de representar o xogo. Este é, escribe Peter Slade: “a maneira da criança de pensar, comprovar, relaxar, trabalhar, lembrar, ousar, experimentar, criar e absorver”. Así e todo, nos seus primeiros anos os pequechos non senten a diferenza, cadaquén é ao mesmo tempo actor e espectador.
A través de tentativas emocionais e físicas, a crianza descobre a vida e a si mesma. A través do xogo e da súa práctica repetitiva, acaece a interiorización, a concentración e a transformación do individuo.
Este libro, versión abreviada da súa obra maior Child Drama, traducida ao castelán como Expresión Dramática Infantil e editada por Santillana en 1978, resulta ser unha moi boa axuda para repensar o proceso educativo entendido como a preparación da persoa para a vida e non como unha morea de datos. Isto esixe tratar ao alumno como unha persoa “enteira”, coa súa afectividade, as súas percepcións, a súa expresión, os seus sentidos, a súa crítica, a súa creatividade…
Cómpre facer algo para que o alumnado poida ampliar as súas referencias sobre o mundo e traballar, ao mesmo tempo, con todas as linguaxes: a escrita, sonora, dramática, corporal… O derrubamento dos muros da escola fará posible integrar a educación ao espazo vivificante do mundo e axudará a alumna ou o alumno a construír a súa propia visión do mundo.
É fundamental cuestionar a educación. E desde logo o xogo dramático é un bo camiño para facelo!
