PUBLICIDADE

O Centro Dramático Galego (CDG) presentou hoxe a programación da temporada 2018-2019, protagonizada por cinco coproducións con compañías privadas e por Neorretranca e Posmorriña, o único espectáculo que a unidade de teatro público producirá este ano. O centro presenta os seus proxectos cunha parte do programa xa executada e cando xa se coñecían os detalles de case todas as funcións que terán lugar no Salón Teatro.

O impulso á dramaturxia galega contemporánea e a reflexión sobre a nosa identidade como pobo centran unha parte importante da nova temporada escénica do Centro Dramático Galego (CDG), segundo os responsabeis do centro. Así, arredor deste dous eixos xira Neorretranca e posmorriña, que dirixirá Gena Baamonde a partir dos textos Fantasía n. 5 en Sol Maior ou Non, de Esther Carrodeguas, e Boisaca ou a divina desgraza, de Roi Vidal Ponte.

No acto tamén se anunciaron as coproducións: Doppelgänger, montaxe sobre a duplicidade interior e exterior escrita por Paula Carballeira e dirixida por Chiqui Pereira para Berrobambán xunto a compañía colombiana El Arca de N.O.E. Estrearase este mesmo xoves 24 de xaneiro no Salón Teatro. O 28 de febreiro chegará a segunda estrea de coprodución: A compañeira de piso, de Contraproducións. A peza, dirixida por Vanesa Sotelo a partir do texto de Jen Silverman, estará protagonizada por Rebeca Montero e Patricia Vázquez.

Xa en maio chegará Invisibles, coprodución do CDG, Redrum e a Concellería de Igualdade do Concello de Pontevedra. A montaxe, xa estreada no pasado mes de novembro, leva a escena o libro homónimo de Montse Fajardo coa dirección de Marián Bañobre e a interpretación de Nieves Rodríguez, Sheyla Fariña e Mela Casal. Ese mesmo mes, o día 25, o coreógrafo Javier Martín presentará a coprodución Soma, unha “experimentación escénica e matérica que se concentra no estudo do corpo e do movemento como fragmento e rito”. E para pechar o apartado de coproducións, Limiar Teatro chegará en decembro con Se fosen turistas levarían gafas de sol, un espectáculo sobre as migracións e a memoria que conta co apoio do Teatro Nacional Dona María II de Lisboa e Comedias do Minho (Portugal), Festival de Teatro de Baía Blanca e Compañía Nacional de Fósforos (Arxentina), Centro Cultural Ignacio Espino (Uruguai), Universidade Okan de Istambul (Turquía) e Comitato 10 Febbraio (Italia).

Rspecto á colaboración e intercambio coas compañías privadas, ademais de ás devanditas cinco coproducións, o CDG ofrécelles a súa sede e a asistencia técnica do seu equipo aos colectivos artísticos que participan na edición 2018-19 de En Residencia. Por este programa pasaron xa Inversa Teatro con Sofía e as postsocráticas e Proxecto Pank + Funboa Escénica con tres proxectos: Masa madre + sal marinaEso que vi e O que segue. Proximamente farano Artesa Cía. con Chola a It Girl, Colectivo Marciano Balboa con O inevitable, peza programada polo festival Escenas do Cambio da Cidade da Cultura de Galicia, e Redrum Teatro con A nena que quería navegar Contos do recreo, ademais de coa devandita coprodución Invisibles. 

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos