Colectivo Glovo, en colaboración coa Área de Cultura, Turismo e Lingua do Concello de Lugo, e co apoio da Agadic, vén de presentar as bases da terceira convocatoria de residencias artísticas e de investigación Atopémonos bailando para profesionais de danza e artes do movemento.
Poden presentarse profesionais de danza e artes do movemento con sede en España e/o Portugal a presentar os seus proxectos para a realización de 8 residencias artísticas e/o de investigación (exclúense residencias técnicas) para ser realizadas entre os meses de abril a novembro de 2024 (cinco delas en Lugo, no Museo Interactivo da Historia de Lugo, MIHL, e tres en réxime de intercambio con estruturas de Portugal e Costa Rica).
O programa de residencias artísticas e de investigación Atopémonos bailando 2024 posibilita tamén o intercambio de tres das residencias seleccionadas a través desta convocatoria con outros tres programas de residencias internacionais. Estes intercambios son froito das colaboracións entre as residencias con entidades de Portugal e Costa Rica.
O período de presentación de solicitudes rematará o 10 de marzo de 2024 ás 23:59 horas CET. As residencias poderán desenvolverse entre o 1 de abril e o 30 de novembro de 2024, e cada residencia realizada en Lugo poderá ter unha duración de entre 5 e 10 días. A residencia en intercambio con Costa Rica, no Taller Nacional de Danza, desenvolverase ao longo de 15 días, nos meses de outubro e novembro de 2024, e as dúas residencias de intercambio con Portugal (no Teatro Experimental Flaviense – Cinema-Teatro Bento Martins – Chaves e na 32.ª Quinzena de Dança de Almada, respectivamente) durarán 7 días cada unha, a primeira entre abril e novembro, e a segunda entre o 27 de setembro e o 5 de outubro deste ano.
Consulta aquí as bases completas das Residencias Atopémonos Bailando 2024
