Volve o Primavera enDanza de Carballo

Sete espectáculos de sala, un obradoiro de danza contemporánea, encontros entre público e artistas, actuacións ao aire libre e unha oferta de actividades complementarias integran un dos programas máis extensos da Primavera enDanza, unha coidada selección dos mellores espectáculos nacionais que nos achegan á danza contemporánea. “É un dos escasísimos festivais de danza e o máis antigo de Galicia”, lembrou o concelleiro de Cultura, Marcos Trigo, na presentación do cartel. De feito, Primavera enDanza cumpre 16 anos.

A primeira cita será o 13 de abril coa conferencia bailada de Toni Jodar, un espectáculo que a técnica de Cultura do Concello de Carballo, Carmen Castro, cualificou como “especial, novidoso e distinto”, porque se trata dunha actividade moi didáctica na que o famoso coreógrafo catalán vai expoñendo e interpretando diferentes danzas contemporáneas de todo o mundo, o que “permite que o público interesado saiba máis sobre a danza dunha maneira moi amena e peculiar”, engadiu Carmen Castro.

Por Carballo pasarán este mes, ademais da conferencia bailada de Toni Jodar, o espectáculo de rúa Viaxes, de Lusco e Fusco (sábado 14), e os de auditorio Vuelos de Aracaladanza (domingo 15); Hollywood, de Andrea Quintana (venres 20); Toda a beleza do mundo, de María Move (sábado 21); Now, de Lasala (venres 27); Si pudiera hablar de esto no haría esto, de Janet Novás (venres 28) e, a maiores, o 4 de maio, o Centro Dramático Galego con Divinas Palabras Revolution estará no Pazo da Cultura.

 

Entradas e bonos

Unha das novidades deste ano é que a venda anticipada de bonos e entradas realizarase a través da billeteira electrónica www.ticketea.com, onde estarán dispoñibles uns e outras a partir do día 9, así coma no teléfono 902 044 226. Os bonos para todos os espectáculos de sala, incluído o teatral do 4 de maio, custan 21 euros (15 para posuidores/as de carné de estudante, maiores de 60 e menores de 12 anos). En canto ás entradas, para os espectáculos dos días 13, 21 e 28 custan 3€ (prezo reducido, 2€); para os dos días 20 de abril e 4 de maio, 4€ (3€), e para os dos días 15 e 27 de abril, 5€ (3,5€).

O día de cada función tamén poderán adquirirse entradas na billeteira do Pazo da Cultura desde 90 minutos antes do inicio. Os venres, as funcións empezarán ás 21.00 horas; os sábados, ás 20.30, e a familiar do domingo 15, ás 19.00 horas.

O programa conpleto pódese consultar aquí 

Deixar unha resposta