O Teatro Ensalle de Vigo remata o ano coa xuntanza en escena de dous creadores moi singulares: AveLina Pérez, actriz e dramaturga que xa coñecemos en Ensalle e Velpister, pianista que estará por primeira vez na sala. A calidade e sensibilidade musical de Velpister será unha sorpresa para algún dos espectadores da sala, mentres que o humor acedo de AveLina Pérez xa é coñecido.
Dende o seu debut no IV Programa Vigo en Bruto AveLina Pérez espertou o interese do público da sala polo seu teatro cheo de contido e crítica non carente de moito sentido do humor. O seu traballo escénico, expón textos cunha multiplicidade de rexistros e a constancia dunha muller cunha fertilidade creativa moi por enriba do normal.
Autora de obras como Gañaremos o pan coa suor da túa fronte, Os cans non comprenden a Kandinsky (editado pola erregueté), ou Ás oito da tarde, cando morren as nais –obra gañadora do último Premio Álvaro Cunqueiro para Textos Teatrais–, tamén está vinculada ao teatro social, como dramaturga, directora e actriz de teatro. Participou na creación da compañía Teatro do Lume e as súas obras foron galardoadas en diversos certames, entre eles o Premio Abrente, o Premio da Audiencia do Premio de Teatro Radiofónico do Diario Cultural, ou o I Torneo Dramatúrxico de Galicia.
Os días 7 (22:00h), 8 (22:00h) e 9 (21:00), o Teatro Ensalle estrea Deixa de tocala, Sam. “Teatro de salón” coa marabillosa decadencia de AveLina Pérez e Velpister. O punto de partida desta creación ten lugar hoxe, agora, cando os referentes se esnaquizan contra o chan, nun golpe seco, e os varredores de lixo recollen o lixo nas bolsas para o lixo. Cando o príncipe de Dinamarca xa non nos salva.
Ficha artística
Dirección escénica e dramaturxia: AveLina Pérez.
Dirección musical: Velpister.
Elenco: AveLina Pérez e Velpister.
Iluminación: Daniel Casquero.
