Crítica

Medida x Medida

Producións Excéntricas

A hybris desmesurada

 

Volve o director e narrador oral Quico Cadaval a frecuentar os patios de William Shakespeare revisitando unha das súas pezas menos coñecidas; logo daquela Noite de reis, coproducida polo CDG en 2007, e do Shakespeare para ignorantes do ano 2010 con Mofa e Befa.

Neste caso, a revisión cae en Medida por Medida, suposta comedia do bardo inglés (suposta porque moitos autores non se poñen de acordo en se é ou non comedia) ambientada nunha Viena de fábula onde a corrupción e a lealdade están enfrontadas, a libertinaxe é delito (sempre que non aconteza no despacho do señor) e disfrazarse para coñecer a verdade, un acto cotián. Malia todo iso (alerta spoiler!), todo acaba ben. É por iso que poderiamos dicir que estamos ante unha comedia, e non ante unha traxedia, malia que a temática da peza sexa tan cruel coma as que atopamos nun Otello ou nun Tito Andrónico.

Polas rúas desta Viena fantaseada desfilan chulos e putas, gardas aparvados e xuíces arrogantes, poderosos corruptos e doncelas atropeladas. Porén, a autoridade do Duque non é posta en discusión e exerce o seu poder absoluto dende o principio e até o final. Vista dende os ollos de hoxe (os meus, claro, o que é inevitable, mais, se cadra, non desexable), esta é unha das cuestións que máis me chaman a atención: a falta de crítica a un poder absoluto e central, que, así e todo, deixa bulir a corrupción arredor de si e agóchase para atopar a verdade dos que ten por leais, utilizando sen vergoña trucos que poñen a dignidade dos seus súbditos en perigo.

Non é só da corrupción política e social do que fala esta peza, xa que a versión de Cadaval centra a súa mirada tamén na inxustiza e a lealdade, destacando a figura de Isabella/Sabela (interpretada por unha Melania Cruz a cabalo entre Santa Xoana de Arco e o James Dean de Rebelde sen causa), a noviza tentada polo poder a deixar o seu corpo a cambio da liberdade do seu irmán, preso por luxuria. É interesante esta visión da virtude, que me axuda a reflexionar como un (eu) está afeito a ver personaxes que sacrificarían o seu corpo pola liberdade dun ser querido (perversións afeitas de telefilme), mentres Shakespeare antepón, de xeito humanamente intelixente, a lealdade da rapaza coa súa virtude por riba do que está preso, precisamente, por perdela.

Medida x Medida teno todo para triunfar: unha produción coidada, un elenco excelente e preparado, unha intelixente disposición de accións cómicas e físicas herdadas do circo e da Commedia dell’Arte (executadas por un Víctor Mosqueira con aire a Charlot), mesturadas co que poderiamos denominar “typical TVG comedy act” (onde reina a actriz Patricia Vázquez) e áxiles cambios de personaxes para os actores e actrices, unha estudada posta en escena con xogos de espazo a través dunhas reixas versátiles, un estupendo manexo da iluminación (deseñada por Dani Juncal) e a combinación de números musicais (teño que salientar a fermosa voz de María Costas, por certo, unha Mariana doce e delicada), onde todos participan. Malia todo iso, persoalmente atopo un exceso de peso no texto e na palabra (para algúns, sacrosanta vindo de Shakespeare), que fai que o ritmo fique monótono. Iso, e o feito de pasar unha e outra vez por lugares coñecidos e xa resoltos en intres anteriores da trama, estragan, ao meu parecer, a sorpresa que agardo atopar nunha comedia, tal e como penso que nos é ofrecida a versión desta peza.

Ficha artística

Medida x Medida, Producións Teatráis Excéntricas (orixinal de William Shakespeare)

Dirección e adaptación: Quico Cadaval.
Reparto:
Melania Cruz, Patricia Vázquez, María Costas, Víctor Mosqueira, Josito Porto, Santi Romay e Evaristo Calvo.
Escenografía e vestiario: Suso Montero.
Dirección musical: Bernardo Martínez.
Deseño de iluminación: Dani Juncal.

 

Auditorio Municipal de Vigo. 11 de decembro de 2020.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!