A Mostra Internacional de Teatro, MIT, de Ribadavia, vén de fixar as datas para a súa 41ª edición. O festival, consolidado como unha das citas imprescindibles en Galicia no panorama das artes escénicas contemporáneas, desenvolverase do 18 ao 26 de xullo de 2025.
A Mostra está a iniciar unha nova etapa, tralo nomeamento de Sabela Mendoza como directora artística e Gena Baamonde como directora adxunta. Esta nova dirección ten como obxectivo “consolidar a MIT como un referente cultural colectivo, promovendo un modelo de festival que funcione como motor de apoio á creación, á diversidade e á pluralidade escénica”. A súa aposta quere centrarse na “renovación e no fortalecemento da identidade do festival, garantindo a súa conexión co contexto teatral contemporáneo e co público”.
Ademais, a nova proposta de dirección artística, segundo explican Mendoza e Baamonde, quere “dar continuidade e ampliar os valores e liñas de acción habituais do festival, combinando experiencia, tradición e vangarda”. Dese xeito, a programación deste ano “incluirá nomes internacionais de referencia, hibridación de linguaxes, talento galego emerxente e consolidado, coproducións, residencias, premios e actividades paralelas”.
O lema escollido para esta edición, “Escenas en tránsito”, pon o foco “en propostas que exploran a mobilidade entre linguaxes, corpos e territorios”. Algunhas das liñas de programación que guiarán esta edición son “O indómito”, para as creacións “que emerxen nas fisuras, nas fendas”; “Laboratorios do presente”, que acolle aquelas propostas “que traballan pensando no hoxe dende perspectivas da complexidade, da relación dos sistemas de representación e réximes sensibles”; “Constelacións”, que engloba “aquelas pezas ou traxectorias que traballan en relación a outras obras ou xenealoxías, tándems creativos, as historias dos colectivos e das agrupacións”; “Corpos en tránsito”, para as creacións “que falan de mudanzas, de transicións…”; e as “Cartografías do xesto”, para propostas “que trasladan paisaxes e poéticas á escena”.
“Formulamos esta proposta co desexo de seguir facendo da MIT un festival internacional de referencia para as artes escénicas contemporáneas, unha cita cultural de orgullo colectivo, para a cidadanía de Ribadavia e para a sociedade galega en xeral, e un contexto artístico de primeiro nivel que celebra a pluralidade e a diversidade”, destacan tamén Sabela Mendoza e Gena Baamonde arredor das liñas de acción que están a acometer dende que asumiron a dirección artística do festival.
A MIT, segundo sinalan, apostará, xa que logo, “pola mellor creación galega e internacional, incorporando novos nomes e figuras establecidas do panorama escénico, ligando memorias e legados a novas dramaturxias e promovendo a mestura e hibridación de estilos e formatos para superar fronteiras artísticas”. Ademais da exhibición de pezas escénicas, a MIT estenderá o seu impacto “a iniciativas que fomenten a creación, a produción e o diálogo entre profesionais e público, reforzando a súa posición como axente dinamizador da cultura”.
Ademais, o festival procurará ter unha presenza continua no sector. “A MIT é un festival que non se limita ás súas datas de celebración, senón que reivindica e celebra a súa existencia como axente cultural e dinamizador tanto da comunidade artística e profesional como para a sociedade en xeral”, tal e como engadiron Mendoza e Baamonde.
20ª edición do Premio Abrente de Textos Teatrais
As bases do Premio Abrente de Textos teatrais de 2025 veñen de ser tamén publicadas polo Concello de Ribadavia que, a través da MIT, convoca a que é xa a súa 20ª edición, un certame consolidado como un dos principais referentes da dramaturxia en galego.
A persoa gañadora recibirá un premio de 4.000 €, ademais da publicación do texto e a posibilidade de apoio para a súa posta en escena, dependendo das posibilidades e dos intereses do autor ou autora premiada.
