Do 12 ao 22 de xuño celébrase o 41º Festival Internacional de Teatro de Expressão Ibérica de Porto que este ano se estende aos núcleos de Vila Nova de Gaia, Matosinhos, Felgueiras e Viana do Castelo. Máis de vinte compañías de Europa e América Latina conforman o programa desta cita histórica coas artes escénicas en Portugal e que neste 2018 toma como fío condutor “os empoderamentos”. Tomando como eixo central a necesidade de dar poder a quen normalmente non o ten, o FITEI presenta nesta nova edición decenas de espectáculos e unha ampla variedade de actividades paralelas dentro dun programa que quere manter “a diversidade estilística e xeracional que ten marcado o festival”.
Cangrejo Overdrive, do colectivo brasileño Aquela Companhia; Mendoza, dos mexicanos Los Colochos; A house in Asia, dos cataláns Agrupación Señor Serrano ou Altíssimo, do pernambucano Pedro Vilela son algúns dos atractivos internacionais que o Festival presenta neste 2018. Debido a cuestións orzamentarias, derivadas dos atrasos no financiamento estatal, o FITEI reserva nesta edición varios espectáculos para o outono como son Correo, da chilena Paula Arso Gho e a residencia Yo Escribo. Vos Dibujás, do arxentino Federico León que se desenvolverán nos meses de setembro e outubro, respectivamente.
Coa mirada centrada na creación portuguesa, o FITEI ofrece un amplo abano de títulos, artistas e compañías que converten o evento nun escaparate imprescindible para aproximarse á escena lusa máis actual. Así, entre as propostas do Festival destacan espectáculos como Margem, a nova peza de Víctor Hugo Pontes con guión de Joana Craveiro e un elenco de adolescentes; Provisional Figures: Great Yarmouth, o último traballo co que Marco Martins pensa a migración portuguesa da última década nesa cidade inglesa ou Walking with Kylián. Never Stop Searching, coa que o Paulo Ribeiro rende homenaxe ao coreógrafo checo Jirí Kylián.
A creación asinada por mulleres conta tamén con un espazo relevante coa estrea de catro pezas como son Longe, de Raquel S.; De onde vens?, de Ana Luena; Bela Adormecida, de Diana de Sousa e Teoria das três idades, de Sara Barros Leitão. A elas súmanse nomes como o de André Amalio coa súa triloxía de teatro documental arredor do postcolonialismo formada por Portugal não é um país pequeno, Passa-porte e Libertação; Nuno M. Cardoso e a súa reflexión sobre a animalidade con Lulú; Luís Araujo e o seu traballo arredor da sustentabilidade en Pulmões; ou Miguel Bonneville e a súa revisión de MB#6 dez anos despois da súa presentación. Por último, completan o cartel do FITEI 2018 espectáculos como Preludio: A Mulher selvagem, de Teatro da Didáscalia; a peza de Odón Von Horváth Casimiro e Carolina, da man de Tonán Quito [na foto], (I)Migrantes, de Teatro do Noroeste/CDV e Nada de mim, unha co-produción de Artistas Unidos e Teatro do Noroeste.
Coa intención de fortalecer e estreitar a relación entre a comunidade, o festival que dirixe Gonçalo Amorim ofrece un conxunto de actividades de formación e reflexión guiadas por artistas convidados que dan forma a espazos como “Isto non é uma escola FITEI”. É o caso de “Como internacionalizar un proxecto” e o “Obradoiro de dramaturxia para a escena”, que imparte Iva Horvat e Marco André Antunes, respectivamente. Entre os espazos reservados para a reflexión e o intercambio, o 21 de xuño ás 16.00 horas no Teatro Rivoli do Porto o teatro galego será o protagonista coa presentación da erregueté – Revista Galega de Teatro e o debate sobre o teatro galego contemporáneo da man de Belén Pichel (Escena Galega), Roberto Pascual (MIT de Ribadavia) e Manuel Xestoso (erregueté).
O programa completo do FITEI pódese consultar aquí.
