A Mostra de Teatro Internacional Cómico e Festivo de Cangas (MITCFC) celebrará a súa 42ª edición entre os días 22 de xuño e o 6 de xullo deste ano. O Auditorio Municipal Xosé Manuel Pazos Varela, as rúas e outros espazos da vila do Morrazo acollerán a programación do festival, que desvelará o seu programa completo no vindeiro mes de maio. Iso foi o que anunciou esta mañá María Armesto, directora da MITCFC, acompañada por Che Mariño, Casilda Alfaro e Salvador del Río, en representación da asociación cultural Xiria, organizadora da Mostra, nun acto no que tamén estivo presente Juanjo Pérez, director do Auditorio Municipal, e no que o elemento central foi o cartel desta edición do festival, que se fixo público.
Este é obra da pintora, ilustradora e muralista galega Xoana Almar, que non puido estar presente no acto de hoxe. Na ilustración poden verse “dúas mulleres rindo e contándose unha historia que se entrelazan e das que xerminan novas sementes”, segundo explicou a propia artista á Mostra. Un marco de ollos envolve as dúas figuras femininas, “que as observa coma nun escenario”.
Xoana Almar
A autora do cartel desta 42ª MITCFC formouse como ilustradora, economista e antropóloga. Estudou en Granada e foi alí onde comezou a traballar no campo da pintura no ano 2008. En 2013 volveu a Galicia e constituíu con Miguel Peralta e Raquel Doallo a cooperativa Cestola na Cachola, onde exerce de muralista, pintora e ilustradora.
No seu traballo poden atoparse influencias de artistas clásicos/as da pintura galega e doutros actuais, especialmente relacionados co mundo da ilustración e do muralismo. A través dos seus personaxes, maioritariamente femininos, sobresae unha procura de formas sinxelas coas que tenta expresar “unha personalidade ou historia de vida”.
