Despois de asistir á lectura dramatizada dos catro textos que combatían, o público do VIII Torneo de Dramaturxia de Galicia escolleu como gañador PEC, que resultou ser da autoría de Gustavo del Río. Foi onte á noite, no Auditorio Municipal Xosé Manuel Pazos Varela de Cangas, dentro da Mostra Internacional de Teatro Cómico e Festivo de Cangas, nunha gala presentada por Déborah Vukušić dunha edición cuxo lema de partida para os textos xusto fora “Isto hai que paralo”.
Nun xogo poético do destino, un pequeno problema técnico inesperado cun micrófono fixo que se tivese que deter o comezo musical do acto e volver comezalo. Déborah soubo xogalo, reforzando a conexión co público e a sensación de maxia do directo.
Despois da presentación do torneo, das regras do xogo e das persoas participantes: as dramaturgas e dramaturgos (Borja Fernández, Cris Balboa, Gustavo del Río e Teresa González Costa) e os actores e actrices (Nadia Doménech e Mighello Blanco, Bea Campos, Iván Davila, Jorge de Arcos, Mónica Sueiro e Ángel Blanco), deu comezo o combate, nun ring emprestado, como todos os anos, por Fran Godón.
O primeiro texto que se presentou foi Quen ten a coroa?, lido por Mighello Blanco e Nadia Doménech. Pon en escena unha conferencia dun rei arredor dos símbolos da coroa que vai derivando cara á exaltación, en todos os sensos, persoal e familiar. O discurso do monarca, en inglés, bate contra as intervencións dunha intérprete que adorna o discurso na súa tradución ao galego, facéndoo derivar cara ao absurdo, nun interesante xogo que nos fai pensar en quen ten realmente o poder. O seu autor resultou ser Borja Fernández.
O segundo texto que subiu ao ring foi Microbiota fecal, un monólogo lido por Bea Campos, arredor da tiranía da cultura da imaxe e do wellness (que vén ser o mesmo que benestar pero en inglés seica ten máis nome de negocio), e dos métodos que se poden chegar a poñer en práctica para acadar ese estado de plenitude física, coas súas inesperadas (e cómicas) consecuencias. Cris Balboa revelouse ao final da gala como a súa autora.
O terceiro texto foi #vinganzadoanxo, subtitulado como “un delirio cósmico nun acto”, que nos traslada ao universo e nos presenta dous anxos gardiáns do ceo, e como un deles busca xerar unha rebelión para parar a desfeita que está a cometer o ser humano tanto na Terra como fóra dela (e as consecuencias que iso ten para os anxos), e como aposta por iniciala usando métodos humanos (as redes sociais). Lérono Iván Davila e Jorge de Arcos, e logo desvelouse que o texto era de Teresa González Costa.
Pechou a presentación, PEC, lido por Mónica Sueiro e Ángel Blanco; un texto que despois resultou ser o gañador da noite, escrito por Gustavo del Río, e que aborda as dificultades comunicativas entre unha nai da xeración X e o seu fillo da Z, e como ela tenta romper as barreiras para poder entendelo e comunicarse con el.
Ao remate das catro lecturas, as persoas espectadoras votaron o texto que querían que gañase, sen saber quen o escribira, coroando PEC. Aínda que o que o público debe votar no torneo son os textos e non a interpretación, cómpre destacar o desempeño dos actores e actrices e como deron vida ás catro pezas, cunha grande expresividade, cando só tiveran dúas horas antes do evento para ver o texto que lles correspondía co seu autor ou autora.
Os textos desta edición foron xa publicados por Edicións Positivas, nun volume que se puido adquirir, ao igual cós das edicións anteriores, ao remate do torneo.
Detrás da organización deste proxecto están Santiago Cortegoso e Esther F. Carrodeguas e a propia MITCFC. O Torneo conta tamén coa colaboración do Centro Dramático Galego.
