Crítica

Deixa de tocala, Sam

Como vivir: velaí a cuestión

| Ana Abad de Larriva |
| Foto: David Rodas |

 

AveLina Pérez é unha valente. En Deixa de Tocala, Sam, que se presentou os días 21 e 22 de setembro de 2019 no Salón Teatro do Centro Dramático Galego (CDG), enfróntase aos piares do teatro convencional, ao poder, á desigualdade, aos discursos incoherentes e mesmo lle pide explicacións ao propio Deus. Faino cunha montaxe que contén o seu xa selo propio, nunha autenticidade sen filtros que se agradece: textos incisivos, enchoupados de carga crítica e cun punto ácido, que se desenvolven ata chegar ao absurdo pola repetición, a acumulación e a esaxeración (e que, aínda así, baixo ese filtro aparentemente deformador, non quedan nada lonxe da realidade, senón que aínda se achegan máis ela); e un estar escénico que aboia entre a aparente presenza mínima e a entrega ás accións físicas e vocais. De feito, hai momentos en que a conxunción destas en relación coa potente música en directo estremece.

No escenario líbrase unha cruenta batalla: dun lado do ring, a dramaturga, directora e actriz AveLina Pérez; do outro, Hamlet, personaxe clave na historia do literatura dramática e do teatro occidental. Enfróntase a un peso pesado: o soliloquio do príncipe de Dinamarca é unha das pasaxes máis coñecidas dos textos de William Shakespeare e a obra segue a gozar dunha gran saúde escénica. Porén, no combate contra o arquetípico personaxe, AveLina non está soa. Nesta ardua tarefa acompáñaa o pianista e artista multidisciplinar Velpister, de quen destacan especialmente o seu virtuosismo e enerxía ao piano e como se complementa no xogo escénico coa actriz.

Formúlase unha interesante reflexión arredor do lugar en que unha ou un decide (ou pode) situarse: aí, no lugar da facilidade, no lugar do privilexio, dos que comen pipas mentres a vida decorre ante eles, das aparencias, dos príncipes de coroa dourada que rebordan testosterona e enchen os teatros, mentres soa “a peza dos que parecemos felices”; ou no lugar de quen arrastra a cruz, de quen se debate cada día entre comer e non comer, no da señora á que lle cae o dente de ouro mentres dá de comer aos peixes da praza e que é tapada polas sombras dos eruditos que se manifestan con pancartas que levan as citas doutros eruditos. AveLina apela directamente ao público ao falar do tempo que ocupa nas nosas vidas o sentimento de culpa (auto)imposto e tamén das aparencias, desa necesidade de sentir ou obrigarnos a sentir aquilo que non sentimos.

Na peza déixanse caer, como ela di, anacos, partes de algo moitas veces oculto e sen cabida nos teatros. Mais estes cachos de vida, ácidos, aparentemente cubertos dun punto de absurdo, achéganse a iso, ás veces tan estraño, tan absurdo, que é o acto de vivir; cando xa nin os príncipes nin as leccións catárticas das traxedias nos poden salvar, nin tan sequera vingar. No escuro, a actriz marcha da sala mais aínda resoa a súa voz pedindo unha explicación a alguén, a alguén que saiba o que é en verdade vivir. Varias espectadoras resumían así Deixa de tocala, Sam, ao rematar a función: “é unha peza diferente, dura, que che fai reflexionar”.

Deixa de tocala, Sam xurdira como unha acción teatral presentada en maio de 2018 no ciclo de Teatro Ob-sceno (Fóra de escena) organizado polo CDG, que dá cabida a aquelas propostas cunha duración máis reducida do habitual, que precisen dun espazo alternativo ao escenario para a súa mostra, e estreouse en formato estendido no Teatro Ensalle, en Vigo, en decembro de 2018. Nesta nova presentación no Salón Teatro, a peza, na súa versión ampliada, levouse ao escenario, en vez de facerse na zona do montacargas, como se fixera na mostra da acción teatral orixinal.

Deixa de tocala, Sam, de AveLina Pérez & Velpister

Dirección escénica e dramaturxia: AveLina Pérez.
Dirección musical e piano en directo: Velpister.
Elenco: AveLina Pérez e Velpister.
Iluminación: Daniel Casquero.
Produción: AveLina Pérez.

Salón Teatro do CDG, Santiago de Compostela, 22 de setembro de 2019.

Ficha artística

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!