Teatro Gorrilla e A Artística de Vigo ofrecen hoxe unha programación especial de danza. A xornada comeza ás 11 horas n’A Artística (Rúa Barcelona 35 de Vigo) cunha práctica creativa de Amparo Martínez, pioneira da danza contemporánea en Galicia, en torno á súa peza O Noso, que está en pleno proceso de creación, baseada en investigar conxuntamente algunhas das ideas que atravesan a peza.
Pola tarde, ás 18 horas, dentro dos Sabadetes, proposta que xira arredor da mostra de procesos creativos, que A Artística quere retomar, Martínez Paz vai presentar O Noso.
A xornada remata n’A Casa de Arriba coa programación do Teatro Gorrilla ás 20.30 horas con Na(i)cemento de Ainhoa Linaza, bailarina de flamenco e pedagoga. Esta peza mestura linguaxes de movemento: flamenco, danza contemporánea, teatralización, texto e linguaxe académica. Aborda as cargas que afectan á muller moderna e que se remontan ao pasado. Indaga nalgúns focos da muller que a fan especialmente vulnerable, como son o parto, o embarazo ou a maternidade.
Ainhoa formou parte de compañías coma Mucha Muchacha e La Tristura; Joaquín Cortés; Ballet Flamenco Español, Flamencas de Ida y Vuelta.
Estivo en tablaos como El Cortijo; Casa de Tapas Dubai, Circuito de peñas flamencas Ocho Provincias ou Espazo Art-Senal.
En 2016 estreou o seu primeiro espectáculo Formas de la Danza Española. En 2021 estreou a súa primeira peza curta performática para espazos non convencionais: Na(i)cemento, finalista no Festival Internacional de Teatro de Ourense, no Concurso de Jóvenes Flamencos Desencaja e obtivo o Primeiro Premio do Concurso Coreográfico de Málaga e o Terceiro Premio no Concurso Coreográfico Andaluz.
Teatro Gorrilla é un proxecto autoxestionado e alternativo que Sergio Llauguer, Laura Merchán e Eva Comesaña levan a cabo. Pretende transformar e democratizar a cultura na cidade olívica, levando propostas contemporáneas de artes escénicas, de artistas independentes, a bares, nos que, polo xeral, só se programan concertos de música.
O funcionamento de “billeteira inversa”, que utilizan en Teatro de Gorrilla, inspirado no teatro de rúa onde se pasa “pasa a gorra”, consiste en facer unha achega económica libre polo espectáculo, unha vez desfrutado, sendo o mínimo recomendado de 4€.
