Roberto Pascual
É o actual vicedirector da ESAD de Galicia e foi director da Mostra Internacional de Teatro de Ribadavia entre os anos 2009 e 2024. É tamén membro do Consello da Cultura Galega, na sección de Xestión e Políticas Culturais, e no ámbito creativo e investigador publicou 'Roberto Vidal Bolaño e os oficios do teatro' (Xerais), '40 anos daquel Abrente' (Galaxia), traduciu e editou a obra de Raúl Dans 'Matalobos' para a ADE, traduciu ao portugués, castelán e galego a obra 'La Merda', de Cristian Ceresoli, traballou como redactor no Dicionario de termos escénicos do web do CCG, realizou o guión do documental 'Non vale parar'. No ámbito da xestión cultural, traballou como asesor no INAEM - Ministerio de Cultura, para o Cabildo de Tenerife, o Instituto Cervantes, a Universidade Complutense ou en informes e comisións do Consello da Cultura Galega. Ten participado en conferencias e encontros diversos, dende o FITEI do Porto ata o HtH CDN de Montpellier, ten publicado artigos en actas de Congresos, revistas e ponencias de diversos países. En 2016 foi o voceiro da Comisión redactora do Anteproxecto de lei de Artes Escénicas de Galicia, presentado no Parlamento de Galicia e pendente de tramitación. Doutor en Estudos da Literatura e da Cultura pola Universidade de Santiago de Compostela, estudou Filoloxía Galega e tamén o posgrao en Arte Dramática. Como divulgador cultural, colabora para varios medios. Como dramaturgo, obtivo o XX Premio Rafael Dieste de Textos Teatrais 2021 da Deputación da Coruña coa súa peza 'Sophie non é o meu nome de guerra'. É membro do consello de redacción da erregueté | Revista Galega de Teatro.
