in

A AAAG esíxelle a Xunta que non paralice a actividade do CDG tras a marcha de Fefa Noia

CDG AGADIC
Fotografía do CDG

A Asociación de Actores e Actrices de Galicia, asociación sindical que reúne a gran parte da profesión da interpretación e da dirección de escena, esíxelle á Consellería de Cutura e Turismo que a marcha da Fefa Noia da dirección do Centro Dramática Galego (CDG) en ningún caso sirva de escusa para abandonar unha vez máis a institución pública de teatro na parálise, tal e como aconteceu entre a dimisión de Manuel Guede en 2015 e a incorporación de Fefa Noia en xaneiro de 2016. Nesa transición, o CDG non produciu ningunha montaxe. Pasaron así 18 meses de baleiro entre a estrea de Xardín Suspenso, a última montaxe da dirección de Manuel Guede en marzo de 2015, e a estrea de Tartufo, a primeira obra con Fefa Noia en setembro de 2016.

A AAAG agarda, por outra banda, que o Consello Reitor da Axencia Galega das Industrias Culturais (Agadic), á hora de convocar o futuro procedemento público de selección para buscar a persoa que suceda a Noia no cargo, non se guíe unicamente por criterios de axilidade administrativa ou inmediatez, senón que ao tempo contemple tamén as condicións necesarias para que a vindeira dirección do Centro Dramático Galego poida levar a cabo a imprescindible refundación da institución de teatro público, deixando atrás a convulsa etapa de Fefa Noia. Unha etapa na que a institución se viu sumida na polémica principalmente por uns procedementos de selección de elencos que, ademais de non axustarse á realidade laboral da interpretación nin á liberdade creativa precisa da dirección de escena, rexistraron un conxunto de presuntas irregularidades que, dende esta Asociación, denunciaron publicamente.

Nestas últimas temporadas, ademais, o Centro continuou cunha liña mínima na súa actividade, programando unicamente unha produción ao ano cun máximo de dez intérpretes en escena. A escasa produción propia e a baixa contratación afastan a realidade actual do CDG do seu pasado e do que debe ser un auténtico centro dramático. Por outra banda, as xiras de distribución sufriron unha considerable mingua na súa duración e tamaño. Todas estas características non responden ás necesidades do público nin as expectativas do sector e, moito menos, ás funcións da institución, cuxa desconexión cos profesionais e cos espectadores agudizouse nas últimas temporadas.

PUBLICIDADE

Por último, cómpre lembrar que tanto Noia coma a dirección da Axencia Galega das Industrias Culturais (Agadic), entidade da que depende o CDG, careceron da vontade precisa para atender as demandas do sector e procurar así solucións de longo percorrido para a institución. Os chamamentos ao diálogo realizados nos últimos anos delatáronse como aparentes e pouco efectivos, tal e como quedou comprobado nunha mesa de negociación convocada pola propia Noia tras as reiteradas peticións desta Asociación. A intención da AAAG pasaba por empregar esta mesa para abordar a necesaria refundación do CDG, tratando a súa estrutura xurídica, a súa autonomía, a sua escasa contratación, a burocratización ou os evidentes atrancos para a exhibición. Non obstante, a administración atallou calquera intento de máximos e reduciuse o diálogo á buscar un parche para os polémicos procesos de selección de elencos.

A AAAG pide que toda esta situación quede atrás parar mirar ao futuro e esíxelle á Consellería de e Turismo que aborde xa a necesaria reforma do Centro Dramático Galego co obxectivo de dotalo dos recursos, orzamentos e da estrutura xurídica necesaria para superar a burocatización, a escasa actividade e o seu esmorecemento xeral.

Por último, a AAAG deséxalle a Fefa Noia o maior dos éxitos na nova etapa profesional e persoal que abrirá o vindeiro 1 de outubro, día no que xa non ocupará a dirección do CDG.

PUBLICIDADE

PUBLICIDADE
PUBLICIDADE
Redacción

Redacción

Somos a erregueté | Revista Galega de Teatro.
A única publicación periódica que ten como obxecto as artes escénicas galegas dende 1983.

Deixa unha resposta

Avatar

O teu enderezo electrónico non se publicará

GIPHY App Key not set. Please check settings

    DonGiovanniPizzi

    Amigos da Ópera da Coruña estreará un ‘Don Giovanni’ dirixido por Carlos Saura

    theater 105574

    Convocadas as axudas a distribución exterior de artes escénicas e música