Actualidade

‘Na butaca’ chega a Cangas cunha función especial no día Mundial do Alzheimer

PUBLICIDADE

O sábado 22 ás 21h, o Auditorio Municipal de Cangas acollerá unha función teatral ben especial de Na butaca [fantasía nº3 en dor Maior], de Esther F. Carrodeguas, pois por unha banda, coa peza Concello de Cangas quere conmemorar o Día mundial do Alzheimer e por outra, trátase dunha función especial, xa que se realizará con piano en directo, semellante á que a se que levou a cabo, tamén en Cangas, durante a última edición da Mostra de Teatro Cómico e Festivo.

Pepa Barreiro, que xoga na casa pois fai moitos anos que reside en Cangas do Morrazo -onde desenvolveu a maioría da súa traxectoria teatral da man de Teatro de Ningures- compartirá escena esta vez con Peter Jensen Velpister, un verdadeiro virtuoso que acompañará o monólogo teatral, ofrecendo ao espectador así un espectáculo que por unha banda é teatro e, pola outra, concerto.

Na butaca [Fantasía nº3 en Dor Maior] é unha peza poética que, dende un punto de vista optimista, aborda unha temática que por desgraza a moitos nos toca de cerca: a das persoas que sufren demencia senil ou alzheimer. A obra, partindo da idea do vivir no presente dunha personaxe sentada na butaca e esquecida –perdida do seu pasado e do seu futuro, tamén–, achéganos a unha realidade que por veces nos amosa paz e outras anguria; felicidade ou rabia. E xunto a ela imos do cómico ao escatolóxico pasando polo transcendente. Na butaca remata por ser un alegato –poético- a favor da vida vivida no presente. Ao fin e ao cabo, quen non pensou algunha vez que o esquecemento nos faría máis felices?

Á entrada e á saída da representación, os espectadores e espectadoras poderán tamén mercar o libro co texto da obra de Carrodeguas, editado por Galaxia.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!