Actualidade

Barriga Verde no museo etnográfico de Castela e León

PUBLICIDADE

A partir de mañá, 10 de abril, e ata o vindeiro 1 de setembro, o Museo Etnográfico de Castela e León en Zamora mostrará a exposición “Barriga Verde: de feria en feria”, encadrada no “Proxecto Barriga Verde” da Asociación Cultural Morreu o Demo.

A exposición pretende mergullar ao visitante no fantástico mundo en que naceron Barriga Verde e os seus parentes, percorrer as súas orixes, internarse nas bambolinas das barracas e teatriños e coñecer os segredos dos titiriteiros que fixeron posible a maxia destes monicreques ata a desaparición de moitos deles, “coincidindo con aquelas feiras de cando o cine e a televisión non chegaran para colonizar os nosos soños”.

Ata o 1 de setembro poderán verse alí os bonecos orixinais de José Silvent e coñecer o mundo das feiras tradicionais canda a historia e as conexións de Barriga Verde: a extensa familia de títeres europeos que son irmáns e curmáns do célebre personaxe. O heroe galego naceu a principios do s. XX, mais forma parte dunha estirpe que se prolonga alén da Prehistoria. Porén, os seus trazos máis característicos débellos ao personaxe napolitano de Pulcinella e a toda a súa descendencia, que se expandiría por Europa a partir do s. XVII.

Debémoslle á familia Silvent a popularización, na primeira metade do século XX, do personaxe de Barriga Verde, digno heredeiro de Dom Roberto e dos cristovos dos bululús galegos. Comezando por un saco de bonecos ao lombo e unha saba pendurada en calquera esquina, o espectáculo chegaría a representarse nun pavillón de madeira que tiña que realizar numerosos pases en cada feira na que recalaba. Poucos lugares de Galicia quedaron sen recibir a visita deste espectáculo, tanto na versión de feira como na de salón, na que ademáis dos bonecos os Silvent proxectaban filmes e organizaban bailes

As persoas que se acheguen ao museo poderán coñecer o títere tradicional galego máis lembrado. A exposición recupera bonecos e pezas orixinais coas que a familia Silvent levou o personaxe de Barriga Verde por festas, vilas e aldeas de toda Galicia durante medio século. Ademais, fai unha introdución ao mundo das feiras a atender aos seus valores culturais, comerciais, sociais ou gastronómicos, e repasa a evolución e as conexións internacionais do títere protagonista.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!