Actualidade

Limiar Teatro estrea ‘Se fosen turistas levarían gafas de sol’ en Montevideo

PUBLICIDADE

O Centro Cultural de España acolle a partir de hoxe tres funcións desta montaxe internacional, na que participan nove artistas de Galicia, Portugal, Arxentina e Uruguai. O espectáculo, dirixido por Fran Núñez, reflexiona en clave de comedia sobre a nosa emigración pasada e presente

 

O Centro Cultural de España en Montevideo acolle hoxe a estrea de Se fosen turistas, levarían gafas de sol, unha coprodución teatral internacional promovida polas compañías galegas Limiar Teatro e Crémilo, na que participan a Xunta de Galicia, a través do Centro Dramático Galego (CDG), e outras entidades de Portugal, Arxentina e Uruguai.

Se fosen turistas levarían gafas de sol é un espectáculo no que, a través da palabra, a música en directo, o son, o movemento, a danza e o audiovisual se presenten en escea pasaxes das nosas historias familiares ligadas ao exilio e a emigración. O fin é recuperar a memoria como metáfora do presente no que vivimos. Existe un paralelismo entre o que sucedeu con nós décadas atrás, o que segue a suceder no mundo e, infelizmente, o que sucederá.

 

Unha revisión do noso pasado dende o humor

O tema é serio e a reflexión debe ser profunda pero o espectáculo non vai ser un velatorio. O espectáculo vai ser unha celebración da vida, da supervivenza, do camiño percorrido. Dende a nostalxia, dende o humor, dende a metáfora pero tamén dende a crudeza do presente. Cualquer tempo pasado non foi mellor, pero así tentamos lembralo. O espectáculo construirase  arredor de cuadros ou esceas nas que compartir pequenas lembranzas, pequenas memorias ligadas ao proceso da migración. A saída, a chegada, o sentimento de ser de ningures, a distancia, a “saudade”,  a integración, a “morriña” e a morte.

O espectáculo, con dramaturxia e dirección de Fran Núñez, fusiona o teatro e a música en directo de Brais Iriarte para reflexionar en clave de comedia sobre a nosa emigración pasada e futura. Faino a través das historias persoais dos artistas que integran o elenco, afondando no acontecido como metáfora do presente. Así, as interpretacións de Iván e Mariano Solarich, Manuel Coelho, Cristian Palacios, Juan Caputo, Martina e Magdalena Fernández, e os propios Fran Núñez e Brais Iriarte resultan unha celebración da vida, da supervivencia e do camiño percorrido a partir dunha trama que se inicia no momento da separación de dúas irmáns no porto de Vigo nos anos 50.

A música creada en directo mediante loops, disparadores electrónicos, pedais e procesadores, a manipulación da iluminación nas mans dos intérpretes e o uso de micromappings son características que fan de Se fosen turistas, levarían gafas de sol unha proposta escénica única e novidosa.

Ademais do CDG, participan no proxecto o Teatro Nacional D. María II de Lisboa, a Compañía Nacional de Fósforos de Bos Aires, Comedias do Minho de Paredes de Coura e El Mura de Montevideo co auspicio do Instituto Nacional de Artes Escénicas de Uruguai. Na estrea colabora tamén a Secretaría Xeral de Emigración da Xunta de Galicia.

O espectáculo, que se foi creando en residencias artísticas levadas a cabo nos distintos países participantes, forma parte do plan de coproducións do CDG para a temporada 2019-2020. Despois da estrea na capital uruguaia, onde terán lugar as tres primeiras representacións do 24 ao 26 de outubro, a montaxe poderase ver tamén en Arxentina, para chegar ao Salón Teatro de Santiago de Compostela do 11 ao 21 de decembro.

 

 

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!