in

O CCVF de Guimarães presenta ‘Vão’, de Erva Daninha

VAO SusanaChico |
Un proxecto de circo contemporáneo nacido no ámbito da Rede 5 Sentidos, xunta o malabarista Vasco Gomes e o acróbata Leonardo Ferreira no escenario do Centro Cultural Vila Flor.

 

O vindeiro sábado 2 de novembro, ás 21:30 horas, a compañía Erva Daninha presenta a súa nova creación no escenario do Gran Auditorio do Centro Cultural Vila Flor (CCVF). Vão -unha obra estreada o 28 de setembro no Teatro Viriato- cruza dous creadores de dúas xeracións diferentes con técnicas e experiencias diferentes: Vasco Gomes, malabarista e director artístico da compañía Erva Daninha, e Leonardo Ferreira, acrobata recén formado no Centre National des Arts du Cirque en Francia, que xa pasou polo CCVF en marzo coa obra Tres, presentada no Circus Arts. Un espectáculo de circo contemporáneo onde o risco e a ilusión nos conducen a través da acrobacia e a manipulación de obxectos, desafiando ao espectador nun ambiente intenso e imprevisible.

Hai un momento en que, ao parecer, todo sae mal, todo se descompón nunha especie de mala sorte ou azar. Este é o momento xusto, a oportunidade á espera, a recuperación, o levantamento, o facerlle unha finta ao destino, o correr sen mirar atrás. Vão é iso. Unha ponte de oportunidade. De súpeto atopámonos nun espazo entre o nada e o baleiro, entre os extremos dunha fenda que temos que superar. Estamos entre quen somos e o que proxectamos ser. Partindo da sinxeleza dunha estrada, o traballo de investigación céntrase na idea de ‘ruta – erro – repetición’ e da constante de equilibrio ou a busca deste.

Publicidade

En Vão non hai texto ou aliñamento predefinido como fío guía para a creación. E este factor é determinante, fundamental e un dos maiores retos. Partir do nada, expoñer corpos no espazo e na relación cos obxectos para chegar a unha composición que contén en si mesma todo o que pode saír da nada, estimulado por textos, imaxes, vídeos, conversas. Unha arte estimulada por diversas artes, por unha mirada atenta e crítica cara ao mundo que habitamos. Partindo do real cara ao imaxinario ou abordando o simbólico a través de obxectos e situacións. “O obxecto símbolo é fundamental no proceso creativo da compañía. A elección do obxecto adecuado e simbólico para cada momento ou incluso para todo o espectáculo é o que nos fai conectar coa realidade, alterar o sistema e manipular a percepción física da situación. Todos os símbolos unidos para falar da vida como é, fráxil e intensa. O símbolo é a comunicación, o obxecto a realidade e o circo, o reto de unir estes dominios de xeito extraordinario”, explica a Erva Daninha.

Estamos ante un circo de situación cuxos acontecementos transmiten unha sensación emocional sobre unha proposta concreta. Tomando como exemplo ese equilibrio que non é só unha demostración técnica de circo senón a sensación de que perder o equilibrio forma parte dunha vida equilibrada. Para cada un de nós nas nosas vidas.Vão “é a culminación dun longo percurso onde, aínda tendo fe no libre albedrío, somos engolidos polas circunstancias da nosa vida e da de outras persoas. Un curso, un ciclo interminable, sen comezo. Como vencer o Vão? Esta distancia entre nós, entre min e eu mesmo”, subliña a compañía.

Vão é o resultado do programa Call for National Artistic Creation promovido por 5 Sentidos, unha rede creada en 2009, no marco do QREN 2007-2013, para promover a programación cultural e a produción artística en rede. Actualmente composta por 9 estruturas culturais portuguesas, a rede 5 Sentidos busca apoiar e axilizar o desenvolvemento de artes escénicas en Portugal, organizando xiras e apoiando a produción de novas creacións mediante cofinanciamento, coproduccións e residencias artísticas. No curso 2018/2019, o programa Call for National Artistic Creation foi dirixido ás áreas artísticas de danza e ao novo circo, sendo convidados os artistas Jonas Lopes & Lander Patrick e a compañía Erva Daninha.

Publicidade
Publicidade
Publicidade
Redacción

Redacción

Somos a erregueté | Revista Galega de Teatro.
A única publicación periódica que ten como obxecto as artes escénicas galegas dende 1983.

Deixa unha resposta

Avatar

O teu enderezo electrónico non se publicará Os campos obrigatorios están marcados con *

LimonesMatarile |

Matarile presenta ‘Los limones, la nieve y todo lo demás’ no TRCDanza da Coruña

BarrigaVerdeAtacaDeNovoAlakran |

O Festival Titiriberia recupera a Feira de Francos como espazo dos monicreques tradicionais