PUBLICIDADE

O FIOT entregará o galardón honorífico de Xograresa de Outono á actriz Patricia de Lorenzo o vindeiro venres 1.

 

O Festival Internacional Outono de Teatro baixará o pano da súa 28ª edición esta fin de semana con dous dos éxitos da tempada escénica: a recentemente estreada Fariña, dirixida por e que esgotou as entradas para a función de Carballo na primeira mañá que se puxeron á venda, e A.K.A. (Also Known As), a creación dramática da Sala Flyhard de Barcelona que se posicionou como un dos fenómenos teatrais na escena estatal.

A.K.A., unha peza valente e comprometida escrita por Daniel J. Meyer e dirixida por Montse Rodríguez Clusella, aborda cuestións como a identidade sexual e racial a partir da historia de Carlos, un mozo de 15 anos que inicia unha relación coa tamén adolescente Claudia. A partir deste momento, e por unha serie de circunstancias alleas ao protagonista, este relatará un periodo da súa mocidade no que treman as súas raíces. O público do FIOT poderá asistir este xoves 31, ás 20:30, á representación de A.K.A., a terceira das obras que conforman OTNI (Obxecto Teatral Non Identificado), o ciclo que pretende achegar ao público as novas linguaxes escénicas través de propostas orixinais e cativadoras. Esta peza é un dos traballos máis exitosos e recoñecidos da tempada escénica, xa que na última edición dos premios MAX foi recoñecida co galardón á Mellor autoría revelación (Daniel J. Meyer) e Mellor actor protagonista (Alberto Salazar), ademais de catro Premios Butaca (Mellor espectáculo de pequeno formato, Mellor texto, Mellor dirección e Mellor actor).

Ao día seguinte, o venres 1, a noite comezará a partir das 20:30 horas coa entrega do Premio de Xograresa de Outono a Patricia de Lorenzo. O festival recoñecece así á actriz polo seu traballo a prol da promoción e desenvolvemento da escena teatral galega. De Lorenzo iniciou en 1990 a súa traxectoria profesional e, catro anos máis tarde, pasou a formar parte de Chévere, compañía de referencia en Galicia e tamén en España, galardoada co Premio Nacional de Teatro, o máis importante das artes escénicas a nivel estatal. Desde entón participou como actriz en montaxes que forman parte da historia teatral galega, como é o caso de Annus Horríbilis, Rio Bravo 02, Citizen, Eurozone, Eroski Paraíso ou a recente Curva España. De Lorenzo é unha das “alma mater” deste proxecto e un dos seus piares fundamentais, tanto dentro como fóra dos escenarios, desenvolvendo labores de dirección, administración, xestión e produción. Ademais, a actriz tamén traballou con Teatro do Aquí, Elsinor ou o Centro Dramático Galego.

Prestixiosos galardóns, como varios ou o Maruxa Villanueva, recoñecen a traxectoria de Patricia de Lorenzo. Agora suma Xograresa de Outono, premio honorífico outorgado por anteriores Xograres de Outono e a Asociación Cultural Telón e Aparte, promotora do FIOT. En anteriores ocasións obtiveron este recoñecemento artistas como Roberto Vidal Bolaño, Artur Trillo, Celso Parada, Víctor Mosqueira, , Dorotea Bárcena, Cándido Pazó, , Marcelino de Santiago “Kukas”, Alberto Gende, Xosé Manuel Olveira “Pico”, Eduardo Rodríguez Cunha “Tatán”, Susana Dans, Miguel de Lira, Mónica Camaño e Manuel Lourenzo.

Logo da entrega do galardón a De Lorenzo, o Pazo da Cultura acollerá a representación de Fariña, a adaptación teatral de José L. Prieto sobre o texto de Nacho Carrretero. A obra, dirixida por Tito Asorey, é un traballo coral no que Xosé A. Touriñán, María Vázquez, Marcos Pereiro, Cris Iglesias e Sergio Zearreta dan vida e voz sobre as táboas a numerosos personaxes recoñecibles no imaxinario do público. Drama, comedia, teatro documento e música ao vivo forman parte dun espectáculo único que iniciará en Carballo unha xira que levará ao seu reparto a percorrer Galicia nos vindeiros meses. O FIOT pecha con Fariña un Programa de Sala cunha obra que incide, precisamente, nun dos pratos fortes desta edición: a aposta pola creación galega contemporánea, da man de tres dos seus directores máis recoñecidos: Quico Cadaval, Cándido Pazó e Tito Asorey.

 

AXENDA DO FIOT PARA ESTA SEMANA

Xoves 31

20:30 horas – Pazo da Cultura. A.K.A. (Also Known As), de Flyhard Produccions

Venres 1

20:30 – Pazo da Cultura. Entrega do galardón Xograresa de Outono a Patricia de Lorenzo. De seguido, inicio da representación de Fariña, de Undodez Producións.

Compartir

PUBLICIDADE

PUBLICIDADE

Deixar un comentario

Subscríbete ao boletín á newsletter

Recibe no teu email as novas, artigos, entrevistas e contidos da Erregueté para que non perdas unha!