Residencias Paraíso celebra o seu cuarto ano de vida como programa de residencias artísticas de investigación e creación arredor da danza e as artes vivas contemporáneas en Galicia.
Este programa sucede grazas a unha rede que atravesa de norte a sur o noso territorio a través da colaboración de espazos de distinta natureza, dende teatros ou centros de arte a facultades ou espazos non convencionais. Este exercicio de diálogo entre todas as partes –impulsores, coprodutores e espazos cómplices– é o que dota dunha identidade tan singular a este proxecto.
Residencias Paraíso pretende fomentar a aparición de novos proxectos de creación arredor das novas linguaxes contemporáneas, alimentando o campo de acción da comunidade artística do noso territorio, tanto a que xa existe como a que está por chegar. É por isto que resulta fundamental abordar o concepto de residencia artística, entendendo esta como un espazo e un tempo adicado á investigación ou creación e, polo tanto, sen obrigatoriedade de elaboración dunha peza artística concluída.
Na súa cuarta edición Residencias Paraíso abre a convocatoria para acoller ata 7 proxectos en residencia cun importe total de 15.000 euros. A convocatoria está aberta ata o domingo 8 de marzo para artistas de todo o panorama nacional.
BASES:
ESPAZOS COLABORADORES EN 2020
- Teatro Rosalía de Castro da Coruña
- Pazo da Cultura de Carballo
- Pazo da Cultura de Narón
- Vello Cárcere de Lugo
- Normal – Espazo de intervención cultural da Universidade da Coruña
- Igrexa Santa María da Magdalena de Ribadavia.
- Salón Teatro / Centro Dramático Galego en Santiago.
PERSOAS DESTINATARIAS
- Creadores/as de danza e artes vivas de creación contemporánea.
- Con maior ou menor traxectoria.
- Artistas con sede en Galicia e no resto do territorio estatal.
- Terán prioridade os/as artistas residentes no territorio galego.
- Poderán presentarse artistas seleccionados/as no programa do ano anterior, sempre e cando no sexa co mesmo proxecto seleccionado en edicións anteriores.
TEMPORALIDADE
- As residencias ocorrerán entre xuño e setembro do 2020.
- A duración de cada residencia será de entre dúas e tres semanas.
- A convocatoria está aberta entre o 17 de febreiro e o 8 de marzo de 2020.
- A selección farase pública no web do Colectivo RPM a principios de abril de 2020 trala confirmación cos/as artistas seleccionados/as.
OBRIGAS DOS/AS ARTISTAS SELECCIONADOS/AS
- Presentar unha memoria explicativa da estancia cun marxe de 15 días dende o final da residencia.
- Facer constar a imaxe do Colectivo RPM, da Axencia Galega das Industrias Culturais, da Xunta de Galicia e do propio espazo anfitrión no material de difusión do proxecto.
- Cumprir a normativa de uso específica de cada un dos espazos onde se realice a residencia.
- Todos/as os/as integrantes de cada proxecto seleccionado deberán estar dados/as de alta na Seguridade Social durante o período da residencia.
- Participar do encontro anual co resto de artistas seleccionados/as nunha xornada aberta ao público o 26 de setembro de 2020 na Sala Mozart do Auditorio de Galicia de Santiago de Compostela.
ENCONTRO RESIDENCIAS PARAÍSO 2019
A Sala Mozart do Auditorio de Galicia de Santiago de Compostela acollerá o día 26 de setembro de 2020 o encontro anual de Residencias Paraíso, coa participación de cada un/unha dos/as artistas residentes e dos espazos colaboradores do programa, onde compartiremos as claves de cada experiencia en residencia nunha xornada aberta ao público. Este encontro é unha oportunidade única para encontrarnos como comunidade, para reflexionar sobre temas transversais que afectan ao sector e revisar de forma conxunta o programa Paraíso.
IMPORTE
- O importe total destinado para este programa é de 15.000 euros (impostos incluídos).
- Cada proxecto en residencia contará cunha dotación económica de entre 1.500 e 3.000 euros (impostos incluídos) en función das características de cada proxecto seleccionado (persoas involucradas no proxecto, duración da residencia, etc…)
- O aloxamento, desprazamento e manutención corre a cargo das persoas residentes.
- Realizarase un pagamento fraccionado do seguinte xeito:
– Entrega da primeira factura polo 50% do importe total durante o período de residencia.
– Entrega da segunda factura polo 50% restante tras o encontro con todos os/as participantes do 26 de setembro de 2020 na Sala Mozart do Auditorio de Galicia e a entrega da memoria xustificativa do período de traballo (que deberá entregarse nos quince días posteriores ao remate da residencia).
DOCUMENTACIÓN NECESARIA
- Formulario de inscrición online.
- Dossier de proxecto: documento cos detalles da investigación ou proxecto a realizar, nomeando, se fose o caso, outros colaboradores ou apoios cos que conte o proxecto (máximo 5 páxinas).
- Traxectoria das persoas involucradas no proxecto con enlaces de vídeo de proxectos anteriores (máximo 2 páxinas)
- Programación expandida: documento explicativo das propostas de diálogo coa comunidade e o espazo anfitrión en relación ao seu proxecto de investigación ou creación.
- Os documentos incluiranse no formulario de inscrición online por medio dun enlace de descarga (por exemplo dropbox, google drive ou calquera servidor elixido que permita a súa descarga).
CRITERIOS DE SELECCIÓN
A selección dos proxectos sera levada a cabo por unha comisión formada por tres profesionais das artes vivas do panorama local e nacional e dous artistas do Colectivo RPM.
Cómpre sinalar que en función dos proxectos presentados e da dispoñibilidade dos espazos algunhas residencias poderían quedar desertas.
A selección do espazo de residencia para cada un dos proxectos seleccionados pola comisión levarase a cabo tendo en conta as características fundamentais de cada proxecto así como a dispoñibilidade de datas do/a artista e do espazo. Aínda que non se pode garantir en todos os casos, o criterio de adxudicación tentará proporcionar tanto a tipoloxía de espazo desexado polo/a artista como o período idóneo para a estancia en residencia.
Valorarase a integridade e innovación artística da proposta, o grao de madurez e solidez do proxecto, a relación entre o proxecto e o territorio, así como as prácticas de programación expandida que poidan arroupar a estancia durante a residencia.
