No confín de… Santiago Cortegoso

Santi Cortegoso é unha das figuras de referencia no panorama teatral galego. Autor de pezas como 0’7% Molotov, Raclette ou Pequenos actos pseudorevolucionarios, foi premiado en numerosas ocasións. O último espectáculo da súa compañía Ibuprofeno Teatro, O mel non caduca, está protagonizado por Marián Bañobre e Avelino González. | Foto: Diego Seixo |

 

O libro que tes sobre a mesa de noite.

L’ Abeille (et le) Philosophe (O filósofo e a abella) de Pierre-Henri Tavoillot e François Tavoillot. Aínda que xa estreamos O mel non caduca, continúo mergullado no universo da apicultura. É fascinante.

A túa banda sonora destes días.

Nenos, paxaros, cans, tractores, desbrozadoras e Radio 3. Pero, ademais, deume por poñer algúns CD’s deses que se amorean a centos desde hai anos nuns estantes esquecidos. Os de Van Morrison e os de música africana funcionan perfectamente. E ata me parece que non están obsoletos!

O último filme que te impresionou.

Songs from the Second Floor de Roy Andersson. Tamén me sorprendeu gratamente Ventajas de viajar en tren do director vasco Aritz Moreno.

A obra de arte na que te perderías agora.

En calquera, con tal de fuxir da realidade. Pero, por cuestións creativas, estes días véñenme moito á cabeza eses cadros barrocos nos que hai moitos personaxes ben colocadiños de xeito que compoñen figuras harmónicas. Non estou nada minimalista.

A peza que che gustaría facer.

Algunha na que eu volva traballar como actor, sen ningunha outra responsabilidade. Vouno deixando pasar e estoume oxidando.

Unha figura histórica coa que compartir unha caña.

Son moito máis de viño que de cañas. Agora mesmo levaría a Homero de furanchos, para tratar de sacarlle información, axudado polo estado de sinceridade que se experimenta despois dun par de cuncas.

Se non foses teatreiro, serías…

Físico cuántico. Encantaríame.

Deixar unha resposta