Bailarina e coreógrafa, Premio da Crítica de Galicia de Artes Escénicas o pasado 2019. Rut Balbís é a directora artística da compañía Pisando Ovos, referencia da danza e do movemento en Galicia e no resto do estado. Entre as súas creacións destacan Que volvan as flores, Give it a Spin ou, recentemente, Directo 9, en coprodución co Centro Coreográfico Galego. Ademais, Balbís ten colaborado con creadoras como Matarile Teatro, Licenciada Sotelo, Traspediante ou Chévere.
O libro que tes sobre a mesa de noite.
Desde hai dous anos a miña mesa de noite cambiou de estilo literario radicalmente e encheuse dunha morea de libros infantís. Polo medio deles continúa El espacio vacío de Peter Brook.
A túa banda sonora destes días.
Pois é unha mestura bastante curiosa entre as bases rapeadas do meu compañeiro nos espertares, a radio coas noticias nos almorzos, algo de Ólafur Arnalds para as clases online e moitas cancións para nenos que van desde A vaca Lola a A saia da Carolina.
O último filme que te impresionou.
Hai tempo quedei marabillada polas personaxes e interpretacións de Scarlett Johansson e Adam Driver en Marriage Story de Noah Baumbach.
A obra de arte na que te perderías agora.
Estou volvendo a ver Barbe Bleue da gran Pina Bausch e creo que me perdería en calquera das súas obras.
A peza que che gustaría facer.
A última peza de Pisando Ovos, Directo 9, estaría de xira durante estes meses despois da súa estrea hai máis dun ano. Encantaríame volver remexer nesta creación antes de que volva a escena.
Unha figura histórica coa que compartir unha caña.
Isadora Duncan.
Se non foses bailarina, serías…
Sempre quixen tocar un instrumento, así que pianista.
