Catorce compañías integran ata o momento a recentemente fundada União das Companhias de Teatro Portuguesas (UCOTEP) que se atopa nunha fase de adhesión de novo membros. A UCOTEP é un movemento fundado o 15 de maio de 2020 que congrega entidades colectivas de creación teatral en Portugal que se identifican como compañías profesionais de teatro.
A UCOTEP defende a creación dun Estatuto Certificado para as compañías; a inclusión das compañías no proceso de implementación da Rede Nacional de Teatro e Cine-Teatros; a auscultación das compañías nos procesos pre-lexislativos de políticas públicas de Cultura en Portugal. Con estes propósitos, a acción da Ucotep pretende potenciar as prácticas do conxunto das compañías e contribuír a incrementar: a sustentabilidade e a empregabilidade do sector artístico portugués, a cohesión territorial do acceso á cultura por parte da cidadanía e o desenvolvemento do sector do teatro profesional en Portugal.
Así, os obxectivos xerais da União das Companhias de Teatro Portuguesas son defender os dereitos e a representatividade das compañías nas institucións tutelares da cultura; poñer en valor as compañías como institucións estratéxicas para o acceso á cultura e para a empregabilidade de artistas e persoal técnico en Portugal; promover a sustentabilidade das compañías xunto con entidades públicas e privadas que favorezan o establecemento de colaboracións para o desenvolvemento cultural.
Desde a actualización realizada o 26 de maio, o colectivo rexistra 14 compañías ao tempo que promove a adhesión de novas integrantes dentro dunha lista de compañías que se renova semanalmente. As compañías adheridas ao movemento ata o momento son:
- ACTA- Companhia de Teatro do Algarve
- Amarelo Silvestre
- Artistas Unidos
- Cegada Teatro
- Historioscópio Teatro de Marionetas
- Krisálida
- Lua Cheia
- Marionet
- Palco 13
- S.A. Marionetas – Teatro & Bonecos
- Teatro Estúdio Fontenova
- Teatro Experimental de Cascais
- Teatro do Noroeste – Centro Dramático de Viana
- Teatro da Terra
