PUBLICIDADE

Vilagarcía acolle unha nova edición do Festaclown do 15 ao 22 de agosto. Quince espectáculos conforman o programa deste 2020 que aposta  pola cultura galega con compañías como Mofa e befa, Cía N+1, Peter Punk, Píscore ou Trío Detrés e combina artistas internacionais como Simone Romanó, Cía. Vaya ou B-Side. Ademais, tras 20 anos de experiencia, o Festival afronta un novo reto cun protocolo antiCOVID para velar pola seguridade das persoas asistentes. | Foto: Ikigai, da compañía SU.MA – Andrés Nadal |

Coa intención de ofrecer risas seguras ao cen por cen, toda a programación trasládase á Praza da II República (diante do auditorio) e para asistir será preciso reservar entrada en reservas.gal ou en www.festaclown.gal. Se ben, dez minutos antes do comezo, as cadeiras baleiras quedarán a libre disposición ata completar aforo.

Por outra parte, cada ano, o Festaclown apoia e crea tecido ao redor do circo e das artes de rúa entre artistas de Galicia e do mundo. Para esta edición, nunha defensa da programación cultural de proximidade, o Festival presenta un cartel maioritariamente galego e acolle seis estreas de espectáculos galegos e outras dúas estreas a nivel global.

O programa comezará o sábado 15 ás 12.30 horas coa estrea do pasarrúas O estraño caso do dentista da rúa Brasov da man de Troula para continuar pola noite co proxecto Cirqueiras  con pases ás 19.30 e ás 22.00. Trátase dun proxecto con Mónica de Nut, Ánxela Branco, Vanessa Rivas, Marta Semprearriba e Raquel Verganzones co que “facer visible o gran nivel das artistas e humoristas femininas”.

O domingo 16 será tempo para Peter Punk coa presentación de Punkdemia nunha dobre sesión ás 19.30 e ás 22.00 horas. Con este espectáculo viral, o Doutor Punkdemia amosará a súa particular visión da pandemia en catro fases e a técnica coa que botar o virus do propio corpo.

O luns 17 o artista italiano Simone Romanó desembarca no Festaclown ás 11.30 horas coa estrea Hop Hop mentres  a tarde será tempo para o Concerto Con Fusión de Píscore ás 19.30 e ás 22.00 horas.

O martes 18 a compañía Trío Detrés ofrecerá unha nova estrea co pasarrúas +Ritmo a partir das 12.30 horas. Pola súa parte, ás 19.30 e ás 22.00 horas Plato, platito, platete será o espectáculo  de malabares que o madrileño  Javi Javichi presentará en Vilagarcía.

O mércores 19 é tempo de estreas coa sesión matinal que Pajarito presentará con Isolada ás 11.30 horas mentres que Cía Vaya + B-Side farán o mesmo con Te veo ás 19.30 e ás 22.00 horas.

O xoves 20 a compañía Mofa e befa abrirán unha nova xornada do Festaclown ás 11.30 horas con Cartoons. Pola noite, será a vez de N+1 coa estrea de O parrulo feo ás 19.30 e ás 22.00 horas.

A actividade do venres 21 comezará ás 11.30 horas co espectáculo Betu el Pallasso da man do catalán Albert Vinyes para continuar pola tarde co espectáculo reivindicativo A saúde é o primeiro con Fran Rei, Pedro Brandariz, O Mago Teto, Isabel Risco e o propio Albert Vinyes ás 19.30 e ás 22.00 horas.

Por último, o sábado 22 Catropés percorrerá as rúas a partir das 12.30 horas con Animacreques mentres que a compañía SU.MA será encargada de clausurar o Festaclown con Ikigai, un espectáculo de circo-danza 360º que Sue Moreno e María Move presentarán ás 19.30 e ás 22.00 horas.

Deste xeito, Vilagarcía volverá encherse de risas e espectáculo un ano máis nunha edición dunha semana de duración para gardar as precaucións que marcan as autoridades sanitarias e manter a personalidade do festival: “Os espectáculos e festivais están mudando coa pandemia, a nova normalidade altera a interacción co público que tanto define o clown, pero temos experiencia e solvencia suficiente para adaptarnos e reiventarnos sen perder a nosa esencia”.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

PUBLICIDADE

Relacionado

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos