Crítica

‘altered natives’ Say Yes To Another Excess – TWERK

Ambigüidades do contemporáneo

| Manuel Xestoso |
| Foto: Manuel G. Vicente |

 
Unha moza deixando ver a inscrición Butterz (‘fea’, ‘desagradable’) nas súas bragas pode ser toda unha declaración de principios. Tamén pode ser unha estratexia publicitaria: Elías e Skilliam, os dous DJs que programan a música dende o escenario, son os propietarios dunha casa discográfica cuxo nome é, efectivamente, Butterz. As ambigüidades da sociedade moderna pasan en innumerables ocasións por ese tipo de paradoxos: un acto de rebeldía constitúe tamén unha operación de márketing. Ou ao revés.

Esa duplicidade é unha constante ao longo de toda a función dirixida por Cecilia Bengolea e François Chaignaud. O escenario é unha pista de baile que semella a dun club nocturno; a iluminación aseméllase moito á de unha discoteca de extrarradio; os bailaríns visten indumentarias tan estrafalarias coma as das mozas e mozos que ateigan os after-hours… E mais tampouco pretende reproducir un club exactamente: a maior provocación artística desta montaxe reside, precisamente, en fusionar pasos de baile que proceden do clásico e do contemporáneo con outros tomados directamente dos estilos urbanos orixinados neste tipo de locais: hip-hop, vogue, house, twerking…

A inevitable reflexión sobre os límites entre o culto e o popular e sobre a súa retroalimentación, non obstante, está moi matizada por un achegamento case paródico, por un espírito rebuldeiro que tende a primar o espírito lúdico que anima o acto de bailar dende o principio dos tempos. Hai unha reivindicación do goce que supón un desafío suplementario e un recordatorio de que a arte sempre procede dos territorios onde as convencións sociais se poñen en cuestión. Que un deses territorios sexa, nos nosos días, a pista dos clubs de baile é unha hipótese que Bengolea e Chaignaud logran dotar de verosimilitude e potencial creativo.

Pero volvamos ás bragas. A celebración do goce tamén inclúe unha mirada inquisitiva que devolve unha imaxe hipersexualizada da nosa sociedade. Os bailaríns non ocultan a pulsión primaria que alimenta cada un dos seus movementos, das súas interaccións, da elección do vestiario. A función está chea de xestos que noutros tempo chamariamos obscenos, de posturas celebradas pola pornografía, de mans que fretan entrepernas… Esoutra ambigüidade, a erótica, colócanos diante doutra contradición contemporánea: a que sinala a delgada fronteira que, ás veces, separa certas prácticas de empoderamento da obxectualización do corpo.

Neste terreo, a compañía sinala a discordancia e colócase de parte dunha agresividade de xenealoxía punk cuxa mestura de exhibicionismo e transgresión non está exenta de humor –hai unha escena memorable cunha coreografía para glúteos que roza o inverosímil–, nin de observación distanciada –como cando recitan moi explícitas letras de cancións (I can do it on a dick) cun ton de ladaíña que as baleira da súa presunta natureza ofensiva.

Por momentos, o espírito de rebelión ante calquera xerarquía afasta o espectáculo da excelencia técnica, pero o virtuosismo nunca fixo parte do programa dos axitadores. A cambio, ofrecen frescura, novidade, irreverencia. E sobre todo, un novo xeito de enfrontar a danza coa sociedade. Algo que non se ve todos os días.
 
‘altered natives’ Say Yes To Another Excess – TWERK de Cecilia Bengolea e François Chaignaud.

Elenco: Élisa Yvelin, Alex Mugler, Ana Pi, Cecilia Bengolea e François Chaignaud
Música: DJ Elijah, DJ Skilliam (Butterz, London – UK)
Iluminación: Dominique Palabaud, Jean-Marc Segalen, Cecilia Bengolea e François Chaignaud
Vestiario: Cecilia Bengolea e François Chaignaud
 
Festival Escenas do Cambio. Santiago de Compostela, 11 de febreiro de 2016.

 

 

 

Ficha artística

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos