in

AGADIC convoca o proceso de selección de elenco para o ‘Divinas palabras’ do CDG

CDG AGADIC
Fotografía do CDG
Agadic non fixo público oficialmente quen dirixirá o espectáculo, aínda que a web do Teatro Español de Madrid anuncia que será a compañía Chévere a encargada de adaptar a Valle.

A Axencia Galega das Industrias Culturais (Agadic) acaba de abrir o proceso de selección de parte do elenco de Divinas palabras, de Valle-Inclán, que o Centro Dramático Galego (CDG) estreará en primavera de 2018. Segundo un anuncio publicado hoxe no Diario Oficial de Galicia (DOG), as persoas interesadas en optar ás sete prazas de actores e actrices, con categoría de principais, convocadas teñen desde mañá e ata o mércores 13 de decembro para presentar as súas solicitudes de acordo coas bases, que poden consultarse no apartado de avisos do web www.agadic.gal.

O proceso de selección é practicamente idéntico ao que se realizou para o anterior espectáculo do CDG, Martes de carnaval, un sistema que levou a un enfrontamento entre a Asociación de Actores e Actrices de Galicia –que chegou a denunciar publicamente irregularidades– e a Agadic e que rematou coa dimisión de tres membros do Tribunal de Selección, entre eles un dos directores anunciados, Tito Asorey.

A AAAG aínda non fixo pública a súa postura ante un proceso de selección que recunca nos mesmos defectos que se lle apuña ao anterior: a falta de liberdade do director dun espectáculo teatral para elixir con criterios artísticos o seu elenco. Nesta ocasión, non obstante, os requisitos para concorrer ás prazas están máis detallados, co fin de eliminar posibles ambigüidades á hora de baremar as aptitudes das persoas aspirantes.

PUBLICIDADE

O CDG aínda non anunciou a programación da temporada vindeira: de forma oficial só comunicou que Divinas palabras terá a súa data de estrea en Madrid o 17 de maio, no Teatro Español, onde permanecerá en cartel ata o día 27.

De igual maneira, o CDG tampouco non fixo público quen dirixirá Divinas palabras, aínda que na web do Teatro Español aparece a compañía como a encargada de levar á escena a adaptación de Valle, algo que xa se coñecía en círculos profesionais de maneira oficiosa dende hai meses.

PUBLICIDADE
PUBLICIDADE
PUBLICIDADE
Redacción

Redacción

Somos a erregueté | Revista Galega de Teatro.
A única publicación periódica que ten como obxecto as artes escénicas galegas dende 1983.

Deixa unha resposta

Avatar

O teu enderezo electrónico non se publicará Os campos obrigatorios están marcados con *

GIPHY App Key not set. Please check settings

    presentacionescenasdocambio2018

    Escenas do Cambio 2018 desenvolverase do 1 ao 10 de febreiro

    eduardoalonso1

    Entrevista a Eduardo Alonso