Actualidade

‘Erori’, de Cair Circo, abre a carteleira de maio no Salón Teatro

PUBLICIDADE

O Salón Teatro de Santiago, sede do Centro Dramático Galego (CDG), abre a súa carteleira para o mes de maio con Erori, de Cair Circo, un espectáculo de clown e acrobacias para toda a familia, que se representará o sábado 5 de maio ás 20,30 h.

Dirixido por Natalia Outeiro cunha dramaturxia non lineal, en Erori as accións sinxelas e cotiás derivan en coreografías acrobáticas, excéntricas, con continuos golpes e caídas caóticas que contrastan con pezas visuais de danza e malabar. A emoción e o risco súmanse ao humor; e o absurdo, o sinxelo e o universal están presentes nas disparatadas rutinas circenses características da compañía.

Catro personaxes aparecen en escena, non falan, están á espera, sorpréndense cando se ven, pero coñécense dende toda a vida. Imítanse, xogan, divírtense todos a unha. Chaman á porta do humor para ridiculizárense, danzan con empurróns e perséguense arriscando a súa vida por un maletín sen sequera saber o seu contido. A proposta busca sensibilizar respecto ás condutas máis habituais contrarias á convivencia e forma parte do programa Estratexia Galega de Convivencia Escolar 2015-2020 que promove a Xunta de Galicia. De feito, hoxe e onte realizáronse tamén no Salón Teatro dous pases matinais dirixidos a alumnado de diferentes centros de ensino.

Con Arile Azkue, Alejandro Costas, Santiago Montero e Óscar Páez no elenco, o espectáculo conta con escenografía de José Perozo, iluminación de Xacobo Castro e música orixinal de Pablo Prego.

As entradas para Erori poden adquirise na propio despacho de billetes do Salón Teatro desde dúas horas antes do comezo da función. O prezo é de 10 euros, cos descontos habituais.

Tras Cair Circo, a programación continuará o 9 de maio cun taller asociado ao espectáculo de danza Directo 9, de Pisando Ovos en coprodución coa Axencia Galega das Industrias Culturais (Agadic), ao que seguirán catro funcións de 6 cubos negros en corpo branco, de Aporía Escénica, do 10 ao 13 de maio.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos