O acto artístico-reivindicativo contra o espolio terá lugar o día 4 de decembro ás 20:00 no Teatro Colón da Coruña.

 

A Deputación da Coruña organiza o martes 4 de decembro ás 20:00, unha gala artístico-reivindicativo contra o espolio da familia Franco para conmemorar o oitenta aniversario da sinatura do documento de doazón. Dirixida por Artur Trillo, na gala participarán César Goldi, Paula Carballeira, Chévere, Quico Cadaval, Ibuprofeno Teatro, Xulio Abonjo e Talía Teatro e contará coa música ao vivo de Caxade.

O acto, como lembrou na rolda de prensa da presentación a vicepresidenta da Deputación da Coruña, Goretti Sanmartín, lembra a sinatura por parte de Francisco Franco da aceptación da doazón do Pazo de Meirás en calidade de Xefe de Estado que está asinada o 5 de decembro de 1938. “É un dos elementos en que se fundamenta os informes xurídicos e históricos para afirmar que Franco recibiu o Pazo en calidade de Xefe do Estado e que el gozaba da residencia de verán desde o ano 38 co que o contrato posterior é unha compravenda simulada para facerse coa propiedade a título persoal”, sinalou na súa intervención

A Deputación da Coruña organiza o acto despois de ser acordado na Xunta pro Devolución do Pazo de Meirás, como un “paso máis no camiño da recuperación como ben público para o que xa remitimos os informes á Dirección Xeral da Memoria e continuamos reclamando que actúen con contundencia e axilicen os trámites dado o perigo de que a familia volva intentar facer outra venda simulada”.

O humor e a sátira serán protagonistas do espectáculo que será conducido polo propio Francisco Franco interpretado polo actor César Goldi. “Nun momento en que hai intención de eliminar o humor como voz crítica nós quixemos que as persoas que se dedican ao humor fosen as que reclamasen xustiza e que traian a familia Franco ao Colón para que escoiten o que a sociedade galega lle ten que dicir a través dos seus humoristas”, sinalou Goretti Samartín que eloxiou o “magnífico cadro de participantes” que conseguirán que “o Teatro Colón se encha para reclamar un tempo novo cando o neofranquismo está campando as súas anchas”.

 

“Irreverentes, sen mordernos a lingua”

O coordinador do espectáculo e director de Talía Teatro, Artur Trillo, defendeu que “Meirás, por un pazo público” bota man da “sátira para denunciar o espolio e eses comportamentos que a xustiza pasa por alto”. Anunciou que as compañías e particulares participantes serán “irreverentes, sen morderse a lingua que é a función dos cómicos”. Neste sentido, e fronte ás acusacións recentes a humoristas, lembrou que “mesmo os reis no feudalismo permitían que os bufóns lles dixesen as cousas e non lle cortaban a cabeza por iso. Non podemos ceder antes o que está acontecendo actualmente”, dixo.

 

O documento de 80 anos

“La ciudad y la provincia de La Coruña hicieron la ofrenda-donación de las torres de Meirás al fundador del nuevo imperio, Jefe del Estado, Generalísimo de los Ejércitos y Caudillo de España “, está escrito no documento da Junta Pro Pazo asinado polo propio Francisco Franco que inclúe no escrito a palabra “acepto” o 5 de decembro de 1938, hai agora oitenta anos, que certifica a entrega do inmóbel na súa condición de Xefe do Estado. A Junta Pro-Pazo, integrada pola Deputación da Coruña, o Concello da Coruña e o Gobernador Civil cedía a Franco a propiedade que fora comprada á herdeira da filla de Emilia Pardo Bazán.

As entradas para “Meirás por un Pazo Público” son gratuítas e pódense recoller na billeteira da Praza de Ourense da Coruña desde hoxe mesmo en horarios de luns a venres de 9.30 a 13 h e 16 a 19.30h e no Teatro Colón unha hora antes dos espectáculos.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos