Actualidade

Iria Pinheiro obtén o XVIII Premio de Interpretación Teatral “Maruxa Villanueva”

PUBLICIDADE

O xurado destaca “a súa valentía na reivindicación do feminismo e na capacidade para empregar a arte e a visibilidade como actriz para causas xustas e necesarias”. | Foto: Olaia Sendón |

 

O xurado do XVIII Premio de Interpretación Teatral “Maruxa Villanueva”, que se reuniu esta mañá no salón de plenos do Concello de Padrón, acordou por unanimidade concederlle o galardón á actriz Iria Pinheiro Santos, da que destacou “a súa valentía na reivindicación do feminismo e na capacidade para empregar a arte e a visibilidade como actriz para causas xustas e necesarias”.

Baixo a presidencia da concelleira de Cultura, Lorena Couso, o xurado estivo conformado polos seguintes vogais especialistas no teatro galego: a escritora e profesora da Escola Superior de Arte Dramática de Galicia Inma López Silva; o actor e profesor da Universidade da Coruña Carlos Caetano Biscainho Fernándes; o dramaturgo, profesor da Escola Superior de Arte Dramática de Galicia, e membro do Consello Asesor do Centro Dramático Galego, Afonso Becerra Arrojo; o profesor da Escola Superior de Arte Dramática de Galicia e director da MIT de Ribadavia, Roberto Pascual Rodríguez; e a doutora universitaria e especialista en teatro de obxectos Comba Campoi García. Actuou como secretaria a animadora social do Concello de Padrón, María Cruz Taboada Álvarez.

En relación coa gañadora, o xurado valorou “a pertinencia do espectáculo Anatomía dunha serea do proxecto berberecheira de Chévere, ante o debate social arredor da violencia obstétrica, así como un proceso de investigación que demostre o sentido comprometido do teatro documentado”. Ademais, destacou que “alén diso, a súa traxectoria amoa unha versatilidade como actriz que, nunha constante reivindicación do cabaret e o teatro cómico, a presenta como unha creadora total comprometida con todas as facetas do teatro”.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!