O xurado do premio “Celanova, Casa dos Poetas” acordou conceder o galardón este ano á actriz Isabel Blanco “polo seu compromiso vital con Galicia a través dunha impecable traxectoria profesional”, segundo informou o xurado. Pondera tamén “a súa actitude positivista e afable, a cultivar unha visión amable da sociedade galega, tanto do aquén coma do alén das nosas fronteiras culturais e emocionais”.
O xurado lembra a súa traxectoria, dende a súa emerxencia inicial como presentadora na Televisión Galega a mediados dos anos 90, á súa eclosión na arte da interpretación televisiva na recordada serie Mareas Vivas, acompañando ó tamén Premio “Celanova Casa dos Poetas”, Luís Tosar. E valora que teña sabido “representar dun xeito moi persoal, os principais valores da nosa sociedade como pobo, modesto e humilde, pero consecuentemente preparado para poder andar polo mundo orgullosos de sermos quen somos”.
Máis coñecida como actriz de cine e teatro, Blanco ten, non obstante, unha delongada carreira no teatro, na que destacan títulos como Sempre quixen bailar un tango, de Teresa González Costa, Rosa de dous aromas, de Emilio Carballido [na foto] ou E(l)las Confidential, de José Prieto, entre outras.
