O XX Festival Internacional de Títeres de Redondela celebrarase do 13 ao 19 de maio

Un total de 31 compañías de Perú, Bélxica, Francia, El Salvador, Arxentina, República Checa, Madrid, Cataluña, Aragón, Castela-León e Galicia compoñen o cartel da 20ª edición do XX Festival Internacional de Títeres de Redondela que se desenvolverá do 13 ao 19 de maio. Xunto coa campaña escolar, a programación de sala e de espectáculos na rúa, a estrutura habitual verase reforzada e enriquecida por un maior número de espectáculos itinerantes e concertos familiares.

Máis de 500 compañías actuaron en Redondela dentro do evento organizado pola Asociación Xente Titiriteira. Coa intención de agradecer o seu compromiso ao longo das dúas décadas de vida do FIT, a organización fixo chegar ás entidades colaboradoras os seus Teatriños Conmemorativos. De igual modo, nesta edición lanzouse tamén o concurso “Cae de Caixón” para o que o público terá que sacar 4 selfies con outros tantos teatriños e subilas ás redes do festival. O gañador será escollido por un xurado composto por 3 persoas de prestixio cultural e recibirá como premio un lote de dúas camisetas, un teatriño e dúas entradas para todos os espectáculos de sala da vindeira edición do festival.

Por outra banda, desde o 27 de marzo e ata o 17 de abril está aberto o prazo para solicitar un posto no Mercadiño Titiriteiro 2019 que dende hai anos conforma unha cita ineludible para os creadores da comarca. Ao longo deses 20 días, todas as asociacións e entidades que queiran participar deberán enviar información do posto por correo electrónico. As bases completas poden consultarse no Facebook do Festival.

Deixar unha resposta