Actualidade

‘Memorias dun ser humano disperso’, de Producións Dispersas, no Salón Teatro de Compostela

PUBLICIDADE

O Salón Teatro de Santiago retoma a súa actividade pública tras a programación especial de Nadal con Producións Dispersas e o seu espectáculo Memorias dun ser humano disperso (versión 7.0), do que é autor e intérprete Diego Freire. | Foto: Áureo Gómez |

 

Esta peza cómico-musical poderá verse desde hoxe e até o domingo na sede do Centro Dramático Galego, onde a compañía xa representou onte, nun pase especial para escolares, a montaxe para público infantil e familiar Tódalas marabillas do mundo.

Tamén hoxe terá lugar unha representación matinal concertada con centros de ensino de Memorias dun ser humano disperso (versión 7.0), á que seguirán tres funcións xerais nos horarios habituais do Salón Teatro: venres e sábado, ás 20:30, e o domingo, ás 18:00.

José Campanari dirixe este monólogo, que a compañía define como “cabaré absurdo, protagonizado por un personaxe fóra de lugar e un pouco esquizofrénico, que desexa escapar dun mundo que non comprende e no que non é comprendido a un lugar lonxe e diferente onde por fin poderá ser feliz”. A busca deste suposto paraíso é o eixo arredor do que xira esta proposta, na que Freire ofrece múltiples facianas como o showman do cabaré, o clown triste, o bufón, o perdedor, o tolo e o soñador.

Trátase dunha nova versión do espectáculo co que Producións Dispersas botou a andar en 2010, baseando o seu traballo en tres piares: humor, pequeno formato e crítica social, desde unha perspectiva contemporánea. En busca da canción perdida, Falándolle ao espello, O bosque dos prodixios ou Tódalas marabillas do mundo son outras das propostas que levou a escena durante estes 10 anos de traxectoria.

As entradas para as tres funcións xerais de Memorias dun ser humano disperso (versión 7.0) xa están á venda na web entradas.abanca.com e no teléfono 902 434 443. No despacho de billetes do teatro, poderán adquirirse desde dúas horas antes do comezo das representacións. O seu importe é de 10 euros, cos descontos habituais, o venres e o sábado, e de 5 euros (prezo único) o domingo, Día do Espectador no Salón Teatro.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos