A compañía de teatro contemporáneo ENSALLE, estrea en Vigo o seu novo espectáculo Antes de que llegue la bestia. Os días 13, 14, 15 e 16 de febreiro, terá lugar a estrea absoluta do novo traballo da compañía. A obra, que poderá verse na sala Teatro Ensalle de Vigo, abre a programación da nova edición do Festival Isto Ferve.
Coa estrea absoluta do seu novo traballo Antes de que llegue la bestia, Cía. Ensalle será a compañía encargada de abrir a programación no XVI FESTIVAL ISTO FERVE ‘20, que se celebrará do 13 de febreiro ao 8 de marzo, na sala Teatro Ensalle de Vigo, ubicada na rúa Chile 15.
Antes de que llegue la bestia” enmárcase no contexto Canchales; unha iniciativa de investigación escénica promovida en 2016 pola Compañía Ensalle, na cal se convida a creadores da escena contemporánea a participar dos seus procesos de creación, posibilitando experimentar camiños comúns e afondar en ideas dende distintas perspectivas e linguaxes. Neste caso, as colaboracións realizáronse con Terrorismo de autor (colectivo audiovisual), o bailarín Sergi Fäustino e Antoine Forgeron, creador escénico, iluminador, técnico de escena e director técnico.
Besta é a palabra clave da peza. A Besta política e económica, a Besta social, o que deixou a Besta nos nosos corpos, a miña propia Besta.
A ollada sitúase no contexto socio-político actual, hoxe. Como está construido o sistema, como nos afecta, como nos relacionamos con el, como podemos evidenciar á Besta, como podemos destruír a evidencia. Bailar a batidas, militar verbas, a acción como rastro do posible, camiñar igual de fronte que de costas, oubear. Pequenas revelacións ou presentimentos.
Canchales
O proxecto Canchales estivo presente no proceso de creación de Antes de que llegue la bestia: en xuño de 2019, lévase a cabo a colaboración entre Terrorismo de autor, Antoine Forgeron e Ensalle no que constituíu o Canchal VI; en setembro, Terrorismo de autor, e Ensalle estrearon o Canchal VI. Parte II; en outubro, Sergi Fäustino e Ensalle comparten proceso para crear o Canchal VII; finalmente, en decembro, con todos os invitados ao proceso –Terrorismo de autor, Antoine Forgeron, Sergi Fäustino e Ensalle– lévase a cabo Canchal VIII, a última colaboración no proceso de creación, antes da estrea da obra o próximo 13 de febrero.
Compañía
ENSALLE compañía de creación contemporánea nacida en Madrid en 1995, estabecese en Vigo en 2003. A compañía é a suma dos creadores Raquel Hernández, Pedro Fresneda e Artús Rei e da súa traxectoria conxunta dende 2005. As súas creacións, son o resultado dun traballo en continuidade e en evolución permanente, levando á escena propostas que mesturan linguaxes cun contido socio-político-vital e en colaboracións con outros creadores.
Con máis de vinte montaxes na súa traxectoria artística, as súas creacións presentáronse en espazos e festivais de España, México, Chile, Arxentina, Uruguai ou Portugal.
Ficha artística
Con Raquel Hernández, Artús Rei e Pedro Fresneda.
Dirección, iluminación e texto: P. Fresneda.
Colaboracións artísticas: Terrorismo de autor, Sergi Fäustino e Antoine Forgeron
Fotografía: Bieito Rey.
Distribución e Produción: María Costa.
Coa colaboración na produción da Agadic
