Actualidade

II Encontro de PRIMEIRA_Encontros coa videodanza, na Coruña

PUBLICIDADE

Este vindeiro xoves 6, ás 20:00, na sede da Agrupación Cultural Alexandre Bóveda da Coruña, terá lugar a II edición de PRIMEIRA Encontros coa Videodanza.

 

PRIMEIRA. Encontros coa Videodanza, nacen coa vocación de abrir unha xanela cara o xénero da videodanza onde focalizar ás persoas creadoras e os distintos traballos que se fan en Galicia, e crear pontes de intercambio entre creadores difundindo o xénero ao público xeral. Están organizados por Resis Festival e pola Agrupación Cultural Alexandre Bóveda e comisariados por Belén Montero.

Este II Encontro contará coa presenza de Lucía Estévez, unha nova directora graduada en Comunicación Audiovisual pola Universidade de Vigo. Estévez traballa a videodanza e a danza en escena desde o punto de vista do traballo actoral e a ficción. Na súa andaina acadou diversos premios como o de CREA á Mellor Dirección Galega no festival Curtocircuito ou o Premio María Luz Morales otorgado pola Academia Galega do Audiovisual.

A cita permitirá coñecer algunhas experiencias de colaboración en materia de videodanza entre mulleres: Gosia Trebacz, artista multidisciplinar, comisaria, profesora… afonda na pintura, fotografía e videocreación: é ademais unha muller emprendedora. Desde o seu espazo, un obradoiro de arte e laboratorio de creación e ideas STO LAT, Gosia atrévese con calquera tipo de creación e acción artística independente; Kirenia Martínez Acosta, coreógrafa, bailarina e actriz titulada pola Escuela Nacional de Arte de Cuba, acadou o premio do VI Certame Coreográfico de Galicia entre outros. É integrante da compañía de danza Entremáns, codirectora artística do Festival Quincegotas e codirectora escénica do Festival dos Eidos; Lupe Vázquez, fotógrafa á continua procura de atmósferas no seu traballo, onde imprimir sutilmente o equilibrio da súa mirada. Forma parte do colectivo Papel de Calzoncillo, grupo que xira arredor da fotografía para á creación de proxectos multidisciplinares onde espandir a imaxe.

Xurxo Gómez-Chao, licenciado en Belas Artes pola Facultade de San Carlos, e con estudos na École Nationale Supérieure des Beaux Arts de Paris, é un artista de referencia na arte galega cunha dilatada traxectoria en pintura e fotografía que traspasa fronteiras. Con el, o público poderá descubrir un dos seus proxectos máis trasversais, producidos pola Fundación Luis Seoane, onde a videodanza, a danza e a música xogan papeis protagonistas.

Estas xornadas están dirixidas a público interesado na danza, á arte e á literatura contemporáneas nas súas diferentes facetas.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!