Crítica

Armazenados

A fábula da formiga

| Iván Fernández |
| Foto: Teatro Art’Imagem |

 

Un rapaz chega ao seu novo traballo como mozo de almacén. Un almacén no que o encargado se vai prexubilar nuns días. Días que ten o encargado para ensinarlle ao mozo as normas do seu lugar. Un lugar, o almacén, no que habitamos todos.

Ata aquí, o argumento da coñecida obra de David Desola que a compañía portuense Teatro Art’Imagen vén de presentar en Vigo neste mes de novembro. Mais o argumento é tan só unha plataforma, un lugar dende onde ofrecer unha visión do mundo e da súa deshumanización (Desumanização é unha das pezas que a compañía ten agora en repertorio).

Poderiamos falar da literariedade da imaxe da quenlla que papa ao peixe pequeno, pero, se cadra, o máis interesante sexa falar de como o peixe pequeno fai para deixarse devorar, fagocitar, deshumanizar, atendendo a tarefas propias de formigas.

O almacén, pois, é unha metáfora estupenda do espazo illado, inútil, creación humana onde gardar cousas. E logo, os gardas do gardado. Supostamente, o gardado no almacén ten unha importancia, e por iso precisa ser gardado. Mais o feito é que o que se garda neste almacén é a persoas. Persoas que non saben que facer se non teñen unha tarefa ou un lugar ao que ir. Persoas que menten e se menten a si mesmas para poder soster a realidade.

Armazenados fala, entón, tamén da mentira. Da falacia feita espectáculo e envolta en plástico transparente. Se un nexo de unión entre os personaxes que aquí aparecen é a mentira que ámbolos dous utilizan como estratexia de supervivencia, esta contrasta con todas as  dualidades que se amosan en cada un: o mozo/o vello encargado, o rapaz que fala galego/o vello que fala portugués, o que fai da norma unha broma/o que non sabe vivir sen normas, o que ten toda a vida por diante/o que non sabe que facer coa súa vida, o que decide quedar encerrado nun almacén/o que sae do almacén a afrontar a realidade… E así poderiamos seguir.

Alén do texto, a proposta escénica está sostida por un estupendo traballo actoral por parte do Jimmy Núñez e do Pedro Carvalho, cun interesante matiz nas palabras e no traballo corporal, así como na relación de forzas entre eles, manifestada de moi diversos xeitos. Do mesmo xeito, a escenografía axuda moito a coller ese ton opresivo, de lugar onde parece que non pasa nada, cando o que pasa é xustamente a vida.

 

Armazenados, de David Desola (tradución de Afonso Becerra e Diana Vasconcelos).

Dirección: Flávio Hamilton.
Elenco: Pedro Carvalho, Jimmy Núñez e Flávio Hamilton.
Axudante de dirección: Samuel Gomes.
Participación en vídeo: Daniela Pêgo.
Espazo escénico: Eduardo Abdala e Flávio Hamilton.
Construción escenografía: José Lopes.
Iluminación: Eduardo Abdala.
Fotografía, Deseño gráfico, Vídeo e Sonoplastia: André Rabaça.
Dirección artística do Teatro Art’Imagem: José Leitão.
Produción: Sofia Leal e Daniela Pêgo.

Auditorio do Concello de Vigo. 7 de novembro de 2020.

Ficha artística

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos